Diputado: Paita sa kinabuhi

Cuentas Claras
Diputado
Diputado(File Photo)

Kanunay na man lang pasanginlan ang Batakang Balaod ngano nga dili mosulod sa nasod ang kapital gikan sa mga langyaw, adunay pangutana.

Aduna ba gyoy pruweba o proof nga ang Batakang Balaod maoy sad-an kon ngano nga naglunang ang atong ekonomiya sa lapok sa kapobrehon?

Aduna bay gihimo nga pagtuon nga nagpamatuod nga ang sad-an niining tanan mao ang gitawag og “restrictive provisions” sa atong Batakang Balaod?

Sa akong nahinumdoman, wala.

Kinsa may nagpakatap sa balita nga ang matod pa “restrictive provisions” sa Batakang Balaod maoy sad-an nga wala mosulod ang kapital sa mga langyaw, dili ba kadto ra pod nga mga tawo nga maoy kusog kaayo naningkamot nga matuman ang gitawag og cha-cha?

Dili ba matawag nga self-serving kining ilang gihimo?

Masaligan ba kining maong mga opisyales nga maoy mousab sa atong Batakang Balaod?

* * *

Tinuod kaha ang ilang katuyoan nga kon hatagan sa kahigayunan sa pag-usab sa Batakang Balaod, kadto lang mga gitawag og “restrictive provisions” ang ilang usbon?

Dili kaha nila iapil og usab ang kabahin sa ilang termino o term limits?

Dili kaha sila mamintaha aron mosamot ang ilang ka-dato ug kagamhanan?

Dili kaha nila kalimtan ang interes sa katawhan ug unahon lang nila pag-atiman ang ilang kaugalingong mga interes?

Makapaabot kaha kita nga hatagan nila og ngipon ang probisyon kabahin sa political dynasty aron maundang na kining gitawag og father, mother, son and daughter-politics?

* * *

Uyon ako sa obserbasyon ni Senador Sonny Angara kabahin niini.

Matod pa niya, bisan pa og usbon ang Batakang Balaod, walay mahitabo nga pag-uswag sa nasod kon magpadayon ang red tape ug ang pangurakot.

Husto kaayo ang maong obserbasyon.

Bisan pa og nindot ang atong balaod pero kon magpadayon ang “lagay” diri ug “lagay” didto aron lang molihok ang imong dokumento o makakuha og paspas nga approval gikan sa gobiyerno, lisod mapaabot nga mopadayon ang mga langyaw sa ilang plano pagnegosyo diri sa nasod.

Kadtong mga negosyante nga wala maanad sa pangurakot, dili gyod mouyon nga pangayoan sila og “kikik” aron lang makapadayon sa ilang negosyo.

Tungod niini, nakahuna-huna ang Senado nga dili dali-dalion ang planong pag-usab sa Batakang Balaod kay gikinahanglan nga tun-an pa kini og maayo.

* * *

Daghan sa mga kongresista ug mga gobernador ang gusto nga maundang na unta ang padayon nga batikos sa mga lider sa nasod sama kanila ni PBBM (Bongbong Marcos) ug ni kanhi FPRRD (former Pres. Rodrigo Roa Duterte).

Ngano man?

Kay ma-crossfire man sila.

Gusto sila nga molaban unta ni PBBM tungod sa panginahanglan sa mga proyekto sa ilang tagsa-tagsa ka mga teritoryo pero dili sab nila mahimo’ng biyaan sab si FPRRD tungod kay kadaghanan sa mga katawhan nagpabilin nga misalig ug misuporta kang PRRD.

Napakita na kini ni FPRRD sa miaging piniliay nga ang iyang mga suporter dili mapalit sa kwarta ug magtuman gyod sa ilang gusto kon kinsa gyod ang ilang botohan panahon sa piniliay.

Buot ipasabot, bisan kon ila pa nga kaalyado ang mga barangay officials sa tibuok nasod, maglisod ang maong mga opisyal sa pagpugong sa gustong botohan sa ilang mga botante sa barangay.

Kon ipamugos gyod nila ang gitawag og “ayuda” sa paghatag sa katawhan, ang moresulta niini kay koprason na hinuon kini ug dili na mapahimuslan.

Nahatag man tuod ang ayuda sa katawhan, dili masaligan nga botohan nila ang gipamugos sa kapitan kay kasagaran kanila, magtuman man gyod pagbotar sa ilang gusto.

Mao kini karon ang dakong problema sa local government units (LGUs).

* * *

Nagbagotbot ang usa ka kontraktor.

Dunay nag-offer kaniya og proyekto nga balor og hapit sa usa ka bilyon ka pesos.

Pero problema ang kondisyon – mangayo og 19% ang nag-offer.

Matod pa sa kontraktor, mogawas man tuod ang maong proyekto pero mouna na pag-gawas ang komisyon bisan kon nagdagan pa ang mga papeles niini.

Paita ning kinabuhia, matod pa sa kontraktor.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph