Daghan na karon ang nagsugod na sa gitawag og special ops - kinaugalingon nga pamaagi nga modaog sa piniliay pinaagi sa kinaugalingon nga pangampanya gamit ang kuwarta.
Kon panahon sa kampanya, iapil ang mga kaubanan sa hangyo sa mga katawhan, panahon sa special ops ang ngalan sa kandidato na lang ang ikampanya, bahala na ang uban. Solo nga kampanya na lang kini, pinaagi sa pagbutang og kuwarta sa sobre diin nakadikit ang pangalan sa kandidato.
Kon kuwartahan ang kandidato, mahimo nga dako nga kantidad ang iyang isukip tungod kay kon basehan sa mga nangagi, mas dako ang tsansa nga modaog kon dako nga kantidad ang ibutang, ilabi na gyud kon daghan ang lumilihok sa maong kandidato ug ilado sab ang ilang pangalan sa mga katawhan.
Pananglit sa mga kandidato pagka bokal sa lalawigan o sa kagawad sa mga lungsod, kadtong kuwartahan ug andam mogasto, organisado pa gyud, makahimo kaayo sa pagpakatap sa ilang special ops sa tanang lugar ug suok sa distrito o lungsod nga walay pilipili.
Kadtong limitado ang kuwarta, magpili na lang sa mga lugar nga daghan og botante ug dako ang ilang tsansa nga modaog.
Bisan kon kauban sila panahon sa kampanya, lahi na kon panahon sa special ops kay kon hunahunaon, silang tanan, apil ang tua sa pikas grupo, nahimo nang kontra kay parehas man sila og posisyon nga gidaganan. Anha na mogawas dinhi ang solo flight, bahala na ang uban sa ilang diskarte. Mao kini nahitabo karon sa usa ka distrito sa Bohol, isig taktakay na ang mga kandidato pagka bokal.
○ ○ ○
Tungod kay amahan sa usa ka kandidato pagka bokal ang mayor sa lungsod, usa na lang ang gidala nga kandidato pagka bokal sa mayor - ang iya rang anak.
Mao kini hinungdan nga hilabihang reklamo sa ubang mga kandidato pagka bokal sa ilang grupo kay wala nila kini mabantayi dayon ug wala usab sila kapangandam.
Migawas nga “nagmata lang og morning,” ug wala kasagang. Labi na gyud ang usa ka kandidato kay una pa niya kini nga sulod sa pamolitika og nagtuo siya nga mahimo lang siya modaog sa piniliay pinaagi sa saad nga batokan niya ang korapsiyon ug dili siya mamalit og boto.
Buyno, wala lang gyud masayod ang maong kandidato nga bisan ang uban niyang mga kauban dili gyud gusto nga modaog siya ug dili sila kampanti nga ikauban sa kampanya ang maong kandidato.
Ngano man? Tungod kay matod pa, dili team player ang maong kandidato, bisan ang iyang mga kauban maigo sa iyang tirada sa kampanya kay permi man siya maghisgot sa mga butang batok sa kurapsiyon, labi na gyud ang pagpamalit og boto kay angay gyud nga botaran sila sa limpiyo nga paagi.
Lisod nang tawhana kay bisan kami nga mga kauban, maigo sa iyang mga tirada, mao kini ang reklamo sa iyang mga kauban. Gawas pa niini, hilabihan ang pagsalig sa maong kandidato sa boto nga iyang makuha pinaagi sa social media, labi na gyud sa Facebook. Nagtuo siya nga ang gidaghanon sa iyang “friends” sa Facebook mao sab ang gidaghanon sa iyang boto.
○ ○ ○
Nagtuo ko nga kadtong lungsod sa Bohol nga namayad ang Mayor og tag-5 ka libo kada botante mao na kadto ang pinakamahal nga palit sa boto, dili man diay.
Aduna pa diay laing lugar nga ang palit sa Mayor kay tag-25 ka libo kada botante, plus ulian pa sa pamilete ang botante nga gikan sa laing lugar nga molupad arong lang mobotar sa maong mayor.
Susmaryusep. Kon ingon ani kadako ang palit sa boto, unsa man kaha ang sitwasyon sa maong lugar - malinawon ug malipayon ba ang mga katawhan og abunda ba ang maong lugar sa mga mehoras sama sa mga maayong karsada, tulay, eskuylahan ug uban pa? Luoy kaayo ang maong lugar kay naghitak ang druga, pipila lang ang adunahan ug hilabihan ka guba ang mga karsada. Ngano kaha?