Naglalis ang usa ka father in law ug daughter in law sa atubangan sa kapitan sa barangay.
Dili unta gusto dawaton sa kapitan ang maong kaso apan nagubot na ang palibut tungod sa pirmi nga kagubot mao nga napugos na lang intawon ang kapitan og apil sa kaso isip referee.
○ ○ ○
Unsay reklamo sa father in law?
Simple ra kaayo. Sa wala pa mopuyo ang iyang anak kauban sa iyang asawa, daughter in law, hamugaway ug malinawon ang iyang pagpuyo. Walay laing tingog nga masunod sa iyang panimalay kondili ang iya rang tingog. Kon unsay iyang gusto mahitabo, mao gyod ang matuman.
Buot ipasabot, sama sa hari ang kahimtang sa amahan bisan kon pinobre lang ang iyang pamuyo.
Nagsugod ang iyang problema sa dihang mihukom ang iyang anak nga kinamanghoran nga motipon og puyo sa iyang amahan, dala ang iyang asawa og lima ka buok mga anak.
○ ○ ○
Gawas sa tingog sa amahan, moapil na sab og yawyaw ang iyang daughter in law, moapil na og sugo ug moapil na sab og pangasaba sa mga suloguon sa balay. Magbuot-buot na sa ilang sud-an, kon unsay ilang i-timo, kon unsay gidaghanon sa lutoon sa kusinero, kon unsang orasa mangaon ug uban pa.
Gawas pa niini, magbuot-buot na sab ang iyang daughter in law sa pagkuha sa mga sud-an ug dad-on sa ilang kwarto aron pirming puno ilang refrigerator ug duna silay makaon pirmi.
Dihay usa ka higayon nga nagsaulog og kapistahan ang amahan ug nag-ihaw sila og baboy. Tungod kay dihay bisita, wala siya makabantay sa dihang gihiwa-hiwa na ang giihaw nga baboy.
Dako ang iyang katingala nga sa dihang naghukad na og pagkaon para sa mga bisita, gamay ra man ang naluto nga cholitas (gi-deep fry nga gusok sa baboy nga may unod pa) nga unta tibuok baboy man ang ilang giihaw, nga sobra sa 120 kilos ang gidak-on sa baboy.
Sa dihang gipangutana ang kusinero kon giluto ba niya ang tanang gusok sa baboy og cholitas, mitubag ang kusinero nga iyang giluto pero dili tanang gusok ang naluto kay gikuhaan na man daan sa iyang daughter in law ug gisulod sa ilang refrigerator. Ang iyang giluto kay kadto lang nahibilin human kuhai sa daughter in law.
Wala ba diay to mananghid nimo, Kol, sumbalik pangutana sa kusinero ngadto sa amahan.
Wala oi, nagbuot-buot lang tog kuha ang tulisan, ingon ana man gyod nang tawhana, tulis diri, tulis didto.
○ ○ ○
Naundang na unta to og tagawtaw ang amahan kay nalingaw sa iyang bisita samtang nagpabugnaw og pipila ka botelya sa beer. Pero samtang nagpadayon sila og dimdim sa mabugnaw nga beer, naalinggatan sa amahan nga dihay gisugo ang iyang daughter in law mao nga milakaw siya ug iyang gisunod.
Dako ang iyang kahingangha sa dihang iyang nahibaw-an nga nagkuha na sab og mga linutong cholitas ang iyang daughter in law, gisulod sa tupperware ug gipadala sa usa ka de-pasaherong sakyanan aron ipakaon sa iyang mga ginikanan ug mga igsuon nga nagpuyo sa laing lungsod.
Pagtan-aw pa niya sa sudlanan, wala nay cholitas nga nahibilin kay gihurot og kuha, giapil pa ang ubang mga sud-an.
Mao kini ang gireklamo sa amahan (father in law) ngadto sa Kapitan - unsay angay niyang buhaton aron maundang na kini ug mabalik ang kalinaw sa iyang panimalay?
Misulti ang Kapitan nga tagaan una niya og usa ka semana ang nagkiha (amahan) ug ang gikiha (daughter in law) nga molabang sa gitawag og cooling-off period, usa pa niya hukmi ang maong reklamo.
Pangutana - unsay angay buhaton aron masulbad ang maong problema?