Medyo kataw-anan ni. Duna koy nahibaw-an nga plano sa mga kandidato pagka-senador nga mohimo sa ilang kataposang panguyab sa mga botante didto sa usa ka probinsiya sa dili pa sila moatubang alang sa katapusang hukom karong Mayo 12 - modaog ba o mapildi?
Siyempre, daghan ang nagtuo nga adto pagahimoa ang maong kalihokan-politikal sa gitawag og capital city kay tua gyod magdasok ang mga katawhan, hasta ang mga puy-anan nga mga hotels, apil na ang mga kan-anan ug ang airport ug seaport.
Gawas pa nga mao gyod kini ang naandang mahitabo. Pero lahi sa gituhoan ang mahitabo. Ngano man? Imbes adto sa gitawag og capital city, adto na man hinuon pagahimoa ang maong kalihokan sa usa ka layo nga lungsod diin ang provincial party chair tua nagpuyo ug tua sab molansad pagka-mayor.
○ ○ ○
Sa dihang gipangutana sa mga bug-at nga hinungdan ang provincial party chair ngano nga gusto niya nga adto sa iyang lungsod pagahimoa ang rally sa maong partido imbes nga adto sa capital city, misulti siya nga ang unang hinungdan kay angay lang nga sila nga mga kandidato sa lokal mabulahan sab sa gituhoan nga bagang duot sa katawhan nga moapil sa maong kalihokan. Nagtuo siya nga dugokon gyod sa mga tawo ang maong kalihokan sanglit gibaniog man nga moanha usab sa maong kalihokan ang usa ka dakong opisyal sa nasod. Midugang siya pagpasabot nga sa iyang nahibaw-an, adunay daghang security problems ang capital city karon. Ngano man? Misulti siya nga daghan na kaayong high-rise buildings ang siyudad, daghan na nga lugar nga matawag nga kuyaw kay pwedeng gamiton sa mga sniper mao nga delikado alang sa mga kandidato pagka-senador apil na sila nga mga lokal. Dili parehas sa akong lungsod nga flat ra tanan, way lugar nga pwedeng magamit sa mga sniper, midugang pa siya. Sa akong nadungog gikan sa iyang baba mismo, gusto unta ako mobahakhak sa tumang kahimuot. Tiaw bay morag hulagway sa Ukraine ug dili sa Pilipinas man ang naa sa iyang hunahuna.
○ ○ ○
Wa pa gyod siya matagbaw, midugang siya sa pagpasabot nga gani sa Davao, delikado na kaayo ang sitwasyon karon. Delikado na kaayo didto bisan kadtong mga tawo nga magsul-ob og t-shirt nga dunay marka nga Duterte, hasta gani ang pagpangita og printer nga mo-printa og dunay marka nga Duterte lisod na nga makit-an. Susmaryosep. Dis-a man kaha kakuha og balita kining tawhana nga sa akong pakisusi, dili man kini tinuod. Sa dihang akong gitawgan ang akong amigo nga kapitan sa usa ka barangay sa Davao City, nanghimakak man siya og misulti nga dili kini tinuod.
○ ○ ○
Ang kataposan og pinakabug-at nga rason, matod pa niya, mao ang problema sa permit. Ngano man? Segurado siya nga dili gyod tugotan sa namunoan sa siyudad nga hatagan sila og permit alang sa maong kalihokan politikal kay maoy mando sa ilang labaw sa Manila. Pagka-dungog nako niini, hapit na gyod ko wa kapugong sa akong bahakhak. Tiaw bay dili isyohan og permit? Sa dihang gisultian siya nga adunay laing grupo nga nagpasalig nga maoy mokuha sa permit alang sa maong political rally, wala na kini tubayi pa sa maong kandidato pagka-mayor. Ngano man? Dili lang gyod siya gusto nga usbon ang iyang personal nga desisyon nga adto sa iyang lungsod ug dili sa siyudad pagahimoa ang maong kalihokan.
○ ○ ○
Buyno, dili pa masuta sa pagka-karon kon mouyon ba sa iyang panahom ang mga opisyales sa ilang grupo sanglit gipadayag ra man sa maong provincial party chairman ang iyang gusto mahitabo. Kay kon basehan ang kasagaran nga mahitabo, anha man gyod pagahimoa ang gitawag og meting de avanci sa capital city kay tua man didto magpunsisok ang daghang mga tawo ug dili gyod didto sa usa ka layo ug awaaw nga lugar. Unsaon pod kaha pagkuha sa suporta sa bagang duot sa katawhan ang mga kandidato sa pagka-senador sa maong grupo kon ingon ani nga klase sa panghuna-huna ang nasulod sa ulo sa ilang provincial party chair? Sa akong nahibaw-an, gusto sa mga kandidato pagka-senador nga makakuha sa pinakadaghan nga suporta gikan sa mga lain-laing hut-ong sa katawhan ug dili lang sa mga lokal nga mga suporter sa mga kandidato-lokal. Gani, mao kini hinungdan nga og mahimo, dili sila moapil sa mga isyong lokal aron makakuha sa suporta sa pikas kampo. Pero kon ang ilang gitahasan nga mangulo sa ilang partido sa maong probinsiya ug mao sab ang moandam sa maong kalihokan adunay panghuna-huna nga ingon niini, tinuod gyod nga delikado ang ilang sitwasyon.
○ ○ ○
Nganong naka-ingon ko nga kataw-anan? Nagtuo ang tag-iya sa iladong kan-anan nga kadtong mga sobra sa napulo ka mga tawo nga miatender sa maong meeting pinangulohan sa akong giingon nga provincial party chair mo-order og pagkaon tungod kay migamit man sila sa maong lugar og sobra sa tulo ka oras. Naunsang pagka unsa nga service water man lang ang gipangayo.