Dili ko moapil sa kaguliyang nga niresulta sa pagkuha og duha ka gold medal ni Caloy, labi na kadtong naapil ang iyahang inahan.
Ngano man?
Diha lang nga milutaw sa dihang midaog na si Caloy, labi na gyod tong nagpusot-pusot na ang mga premyo nga iyang madawat gikan sa lainlaing mga tawo ug mga kompaniya.
Hilabihan na ka-dato ni Caloy karon, hilabihan na sab siya ka sikat ug gani, daghan na ang nakaila kaniya karon.
Segurado nga hugopan si Caloy sa mga tawo, kasagaran mga politiko, inig tugdon na niya sa Manila. Mao ni giingon nga “the victor has many fathers, the loser is an orphan.â€
○ ○ ○
Dili ikalimod nga dako kaayo nga garbo sa nasod ang nahimong kalamposan ni Caloy kay tiaw bay naapil na ang Pilipinas sa mapa sa mga malamposon sa 2024 Olympics. Ug dili kay usa ra, kondili duha gyod ka mga medalya ang iyang nasungkit.
Sa mga atleta sa bisan unsang linya, nindot na kaayo pamalandungon nga mo-qualify o maapil sa lista sa mga moapil sa Olympics, modaog man o mapildi.
Grabe kaayo ang mga screening nga pagahimuon aron lang maapil sa lista sa moduwa sa Olympics. Mao kini hinungdan nga sama sa gibayaw na sa kahitas-an kadtong mga atleta nga maapil sa lista.
Unya sa nahitabo kang Caloy, malamposon nga nakuha niya ang duha ka bulawan nga medalya nga nagpakita lang nga sa maong natad sa paugnat sa kusog, siya ang “pinaka†sa tibuok kalibotan.
Yes, ang mga atleta sa tibuok kalibotan gyod ang gibuntog ni Caloy.
○ ○ ○
Unsa may mga leksiyon nga atong makat-onan niini?
Una, gikinahanglan nga pilion nato ang mga klase sa paugnat sa kusog nga takdo o mosibo sa atong physical nga kahimtang. Pananglit, tungod kay kulang man sa gitas-on ug gidak-on ang atong mga atleta, angay nga adto kita mo-focus sa mga paugnat-sa-kusog nga wala magkinahanglan sa katas-on og gidak-on.
Sama sa gisulti ni El Presidente Ramon Fernandez, angay irepaso ang sports program sa nasod og tutokan nato ang mga klase sa paugnat sa kusog nga haom sa atong physical nga kahimtang.
Sama sa basketball, lisod atbangon ug pildihon ang atong kakontra nga adunay gitas-on nga 6’8 o 7 ug mas taas pa, dugangan pa gyod sa gidak-on ug kaabtik molihok tungod kay ang atong mga atleta mga mubo man.
Nganong taas ug dagko man ang ilang mga atleta?
Daghang hinungdan pero ang usa sa pinaka-importante nga panakot niini mao ang ilang pagkaon ug husto nga training.
Gigalam sa hustong pagkaon, training og uban pa nga mga suporta ang ilang mga atleta og mao kini hinungdan nga makakuha gyod sila og mga maayong mga atleta.
Diri sa ato, dali ra kaayo masukod ug mailhan kon unsang klase ang atong “pagmahal†sa atong mga atleta. Unsaon man?
Suroy ra god sa mga canteen o mess hall panahon sa Provincial Meet, Regional ug National Meet og tan-awa ang ilang mga pagkaon.
Sa mga atleta, nagmantinil lang intawon pero murag nagpista ang pagkaon sa mga opisyales. Makita dinhi nga mas lami ug mas daghan pa ang pagkaon sa mga opisyales kay sa mga atleta.
Husto ba kana ug angay ba kana nga padayunon?
○ ○ ○
Lain nga subo nga hulagway sa atong sports program mao ang gihimo sa mga LGUs nga mga basketball tournaments.
Ang una nilang gihimo mao ang paghatag og dagko kaayo nga mga premyo sa mga mananaog ug miresulta kini nga mag-import na lang sa taga-laing lugar ang mga mosalmotay ug pasagdan na lang ang ‘local talents’ kay gusto lagi nga makadaog ug makasungkit sa dagko nga mga premyo.
Imbes ugmaron ang paugnat-sa-kusog, nahimo nang katuyoan mao ang pagdaog. Napasagdan na lang ang ilang responsibilidad nga ugmaron ang paugnat-sa-kusog.
Unya ra ba, panahon sa kampanya, nagbula-bula lang ang mga baba sa mga kandidato sa tagawtaw nga ilang ugmaron ang sports program sa ilang lugar.