Diputado: Unsaon kaha ni ron?

Cuentas Claras
Diputado
Diputado(File Photo)

Naunsa na man ni?

Sa wala pa hisgoti ang mahitungod sa laraw pag-usab sa Batakang Balaod pinaagi sa people’s initiative, wala ra man untay kisaw, padayon ra man unta ang kalinaw ug kahusay sa dagkong mga politiko sa nasod.

Pero sa dihang gibuksan ang isyo kay matod pa, dunay palit nga gipanghimo aron makuha ang pirma sa mga tawo aron usbon ang Batakang Balaod, mikalit man lang og kagubot.

Nagbawsanay na man ang pagsabwag og lapok.

Makaayo kaha kini sa nasod kining ilang gibuhat samtang nag-agulo sa kalisod ang katawhan sa ilang inadlawng panginahanglan?

○ ○ ○

Pirmi gyod ni mahitabo.

Kon hisgotan na gani ang pag-usab sa Batakang Balaod, daghang isyo gyod dayon ang mosilaob, magkutay-kutay dayon ang mga batikos sa dagkong mga opisyal ug makalimtan na ang mga panginahanglan sa bagang hut-ong sa katawhan.

Kon imong tan-awon, sama sa nagtapok og lapok ang masig ka kampo, dayon sabwag sa lapok kon husto na sa panahon, samtang ang mga kabos nga nagkalisod na og pangita og makaon ug uban pang panginahanglan matag adlaw igo na lang sa paghulat og unsay sangputanan sa tanan.

Unsay mas importante, ang ilang madungog ug makita nga bawsanay sa batikos o ang ilang tiyan nga gigutom o sa ilang mga masakiton nga wala na intawon matagad?

○ ○ ○

Karong bag-o lang, hilabihan ka lanog ug ka sipa ang mga tirada ug batikos gikan sa pamilya Duterte didto sa Davao batok sa Presidente, sa iyang asawa ug sa Speaker sa Ubos Balay-Balauranan.

Grabe na kaayo kay miabot na kini sa isyo sa pag-gamit og drugas ug sa hulga nga mahisama ang Presidente sa gidangatan sa iyang amahan kaniadtong 1986.

Nahimo nang uni-enemy ang uni-team kaniadto.

Sama sa nagbadlis na gyod ang duha ka grupo nga morag aduna nay sama sa “Berlin Wall” tali kanila, nga sama sa wa nay atrasay kining ilang gibuhat.

Delikado kini kon maapil na sa ilang birada ang kapulisan ug ang military kay nasayod na kita kon unsa ang mahitabo kon moapil na sila, kay mga armado ra ba ni sila.

○ ○ ○

Tungod niining nahitabo sa taas, apektado sab ang dia sa ubos. Karong mga panahona, aduna nay migawas nga mga balita nga natunga na ang mga dumadapig, pabor sa grupo sa presidente ug kadtong pabor sa grupo sa kanhi presidente.

Matod pa, kinsa nga grupo ang angay buligan, ang grupo sa Speaker o ang grupo sa Bise Presidente? Kon gusto ka og kwarta ug ayuda, matod pa, maayo kuno ang grupo sa Speaker pero kon gusto ka og grupo nga kasaligan ug gisaligan sa katawhan, maayo kuno ang grupo sa Bise Presidente.

Gani, daghang mga kasamtangan nga gobernador ang nabutang sa alanganin.

Gusto sila sa grupo ni Bise Presidente pero di sab sila ka-biya sa grupo sa Speaker.

Unsaon kaha namo ni ron, matod pa sa usa ka gobernador.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph