Diversion road himuon aron mga Acasia sa Carcar di putlon

Diversion road himuon aron mga Acasia sa Carcar di putlon
SunStar Local News

Siglo na og edad nga mga punoan sa Acacia nga nag­linya sa national highway giluwas sa road-widening projects sa Department of Public Works and Highways (DPWH).

Sa post sa media arm sa Cebu Provincial Capitol, ang DPWH moagi og alternatibong rota aron mapadayon ang road-widening project ug mapreserbar ang mga punoan sa Acacia sa Barangay Perrelos, Carcar City.

Si Engr. James Reyes, DPWH first engineering district head, nipresentar sa mga plano ngadto kang Gob. Gwen Garcia atol sa tigom sa Kapitolyo niadtong Hulyo 5.

Diha usab sa maong tigom si Carcar City Mayor Patricio Barcenas ug Dr. Jose Bersales, Capitol Consultant on Museum and Heritage.

Ang alternatibong rota labing menos tunga sa kilometro (500 metros) ang gitas-on ug 10 metros ang gilapdon.

Si Carcar City Mayor Barcenas niingon sa usa ka pakighinabi sa telepono niadtong Dominggo, Hulyo 7, 2024, nga iyang gidayeg ang DPWH sa pagsunod sa lokal nga mga balaod sa pagpreserbar sa kahoy.

“Para nako, mao to’y labing sakto kay protektahan nato ang atoang Acasia tree kay naghatag man gyud na nato sila og gwapo sa Carcar,” matod ni Barcenas.

Subay niini, niadtong 2005, dihang napili siya nga mayor, si Barcenas niingon nga gideklarar sa Carcar City Council nga ang laray sa mga punoan sa Acacia sa Barangay Perrelos kabahin sa kabilin sa dakbayan ug kinahanglang protektahan.

Si Barcenas nipadayag nga gikinahanglan ang road widening aron mawagtang ang grabeng trapiko sa national highway.

“Mahug man nga bottle neck ta dira kon di ta mo-cooperate sa widening,” matod niya.

“So, gipangitaan nilag paagi nga ma divert ang kalsada,” dugang ni Barcenas.

Ang alternate road kay win-win solution alang kang Barcenas. Gisulbad niini ang mga isyo sa grabe nga trapiko ug gipanalipdan ang mga punoan nga giila nga kabilin.

Dugang pa, sumala ni Barcenas, ang pasiunang plano mao nga ang mga motorista paingon sa habagatan moagi sa bag-ong rota samtang ang paingon sa dakbayan sa Sugbo moagi sa karaang karsada.

Dugang pa ni Barcenas nga daghan sa mga lokal ang wala makauyon sa pagpamutol sa mga punoan sa Acacia tungod kay kini nga mga kahoy naghatag og buhi nga talan-awon sa dapit. / JPS

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph