Menor de edad nga babaye nga part-timer nga deejay sa usa ka FM station sa Sugbo “gitabangan og lugos” sa duha ka mga opisyal sa banko alas 2 sa kaadlawon sa Biyernes, Marso 1, 2024 sa Brgy. Bolinawan, dakbayan sa Carcar.
Mga ngan sa mga suspek gipugngan ning mantalaan tungod sa hangyo sa mga polis samtang ang biktima di sab manganlan kay gawas nga menor, biktima usab siya sa abuso.
Ang biktima nga si Jenny (di tinuod nga ngan),17, taga Brgy. Liburon, Carcar City, tinun-an sa college, samtang ang mga suspek mao sila si Tino, 28, bank supervisor, taga Brgy. Agus, Dakbayan sa Lapu-Lapu ug si Chad, 24, account officer, taga Sitio Dunggo-an, Brgy. Bolinawan, Carcar City
Si Police Lt. Col. Bryan ‘O Niel Salvacion, hepe sa Carcar City Police Station nga nahinabi sa Superbalita Cebu pinaagi sa telepuno, nagkanayon nga ang mga suspek ilang nadakpan sa hot pursuit operation alas 6:00 sa buntag sa ilang gipangpuy-an.
Ang biktima uban sa iyang uyab, nga kauban sa trabaho sa mga suspek, maoy nagkuyog pag-report sa kapulisan.
Ang biktima nibutyag sa kapulisan nga nagpaabot siya sa iyang uyab nga nagtrabaho sab sa banko nga gikataho’ng nag audit hangtod sa kaadlawon.
Samtang nagpaabot siya, ang mga suspek nga hubog nibunlot kaniya, gibira siya sa likod sa banko dungan sa pagtabon sa iyang baba.
Wala siya nakasukol sa duha ka mga suspek hinungdan nga nakuha ang iyang pagkababaye.
Sa pag-abot sa iyang uyab, iya kining gisultihan sa nahitabo ug dali sila nga ningtaho sa police station.
“Kompiyansa ang biktima kay kauban man sa trabaho sa uyab. Naunsa man gipugos naman siya pagbunlot,” dugang ni Salvacion.
Ang biktima gipa-medical exam na sa kapulisan samtang sa Lunes ilang ipasaka ang tukma’ng kaso.
Ang mga suspek wala ninghimakak sa hitabo apan lahi-lahi og mga pamahayag kabahin sa nahitabo. / GPL