Nipahigayon og personal nga pagbisita ang Department of Migrant Workers (DMW) pinaagi sa National Reintegration Center for OFWs (NRCO) ug ang DMW Regional Office VII sa mga OFW-entrepreneurs sa tulo ka managlahi nga lokasyon sa Lalawigan sa Sugbo niadtong Hulyo 18, 2025, isip kabahin sa programa nga “Kumustahan: Usapang OFW.”
DMW, NRCO miduaw sa OFW-entrepreneurs sa Sugbo
Ang maong kalihukan nagtumong sa pagsuta sa tinuod nga kahimtang sa mga negosyante nga OFW ilabina sa ilang kalambuan, mga hagit, ug dugang pang panginahanglanon sa ilang gipadagan nga panginabuhian.
Kini usab usa ka pamaagi sa gobiyerno aron ipakita ang padayong suporta sa mga Overseas Filipino Worker (OFW) sa ilang pagbalik ug pagpaningkamot sa nasod.
Gipangulohan ang grupo ni NRCO Director Andrea Luisa “Ande” C. Anolin, kauban ang Supervising Labor and Employment Officer Luchel Senarlo-Taniza, ug uban pang mga opisyal sa Welfare Reintegration Services Division sa DMW RO-VII.
Sa koordinasyon ni Public Employment Service Office (Peso) Manager Aileen Kantara-Panoy, gibisita sa grupo ang USWAG Cebuano South Overseas Filipino Workers Association, usa ka benepisyaryo sa Tulong Puso Program nga nagpadagan og General Merchandise business sa Barangay Campo Guadalupe, Dakbyan sa Carcar.
Gibisita sab nila si OFW Rhona Mae Quijano nga nagdumala sa negosyo sa banana chips ug ukay-ukay uban ang iyang pamilya sa Valencia, Siyudad sa Carcar.
Ang katapusang pagduaw gipahigayon sa Luray 2, Sipaway, Dakbayan sa Toledo diin ilang gisuwayan ang Rambies’ Collection, usa ka negosyo sa fashion accessories nga pinangulohan ni OFW Rambie Go nga usa ka award-winning designer sa maong industriya.
Gipadayag sa DMW ug NRCO nga andam silang motabang sa mga panginahanglan sa mga OFW-entrepreneurs pinaagi sa tambag, koordinasyon, ug mga posibilidad sa dugang nga ayuda.
Ang maong pagbisita nanghinaot nga mapalig-on pa ang koneksyon tali sa gobiyerno ug sa mga OFW aron masiguro ang malungtarong kalampusan sa ilang pagpanarbaho ug pagpanginabuhi sa Pilipinas.
Kini nga inisyatibo nisangpot sa mas lig-on nga panaghiusa ug bag-ong paglaom alang sa mga OFW ug ilang mga pamilya sa Sugbo. / PR