Sa pagsaulog sa Araw ng Kalayaan niadtong Hunyo 12, 2025, ang Department of Migrant Workers Regional Office VII (DMW RO-VII) nipagawas og duol P2 milyunes nga pinansiyal ug livelihood assistance alang sa mga Overseas Filipino Workers (OFWs) sa mga probinsiya sa Bohol ug Negros Oriental.
Sa lalawigan sa Bohol, personal nga gitunol ni DMW RO-VII OIC-Regional Director Maria Eloida O. Cantona ang mga tseke ngadto sa 19 ka benepisyaryo ubos sa programa nga Agarang Kalinga at Saklolo Para sa Mga OFWs na Nangangailangan (Aksyon Fund) ug sa Livelihood Program alang sa mga dokumentado ug dili dokumentadong OFWs.
Gipahigayon ang pagpanghatag sa mga tseke atol sa Local ug Overseas Job Fair sa Lungsod sa Trinidad, Bohol diin niabot sa P1,280,000 ang kantidad nga napagawas sa departamento.
Samtang sa Dumaguete City, Negros Oriental diin padayon sab ang job fair, gipang-apudapod ang tseke sa OFWs nga taga-Negros Oriental ug Siquijor.
Ang maong aktibidad gipangulohan ni Chief Mary Chris Relon sa Migrant Workers Processing Division kauban ang DMW RO-VII team nga nakahatag og P670,000 nga tabang pinansyal.
Ang mga inisyatiba nagpakita sa lig-on nga suporta sa DMW RO-VII sa mga OFWs ug ilang pamilya pinaagi sa direkta nga ayuda ug oportunidad sa trabaho nga usa ka dakong tabang ilabina sa pagsaulog sa kagawasan ug pagpaambit sa paglaom sa mas malinawon ug malungtarong panginabuhi. / PR