Nipagawas ang Department of Migrant Workers Regional Office VII (DMW RO-VII) og kinatibuk-ang kantidad nga PHP14,975,000 nga pinansyal nga tabang alang sa 219 ka mga nanginahanglan nga Overseas Filipino Workers (OFWs) ug sa ilang next of kins (NOKs) sa usa ka espesyal nga kalihukan nga gipahigayon niadtong Hunyo 5, 2025, sa Department of Manpower Development and Placement (DMDP)/PESO Cebu City.
Isip kabahin sa selebrasyon sa ika-30 nga National Migrant Workers’ Day, gipahigayon ang kalihukan nga giulohan og “Releasing of Financial Assistance under the AKSYON Funds CUM Financial Awareness Seminar/Small Business Management Training (FAS/SBMT) and Migrants’ Rights Awareness.”
Ang tumong niini mao ang pagtabang sa pinansyal nga panginahanglan sa mga nanginahanglan nga OFWs samtang naghatag og edukasyonal nga sesyon bahin sa financial literacy, pagdumala sa gagmay nga negosyo, ug kahibalo sa mga katungod sa mga migranteng trabahante.
Ang matag benepisyaryo nakadawat og pinansyal, medikal, o burial assistance nga nagkantidad gikan sa PHP50,000 hangtod PHP100,000 nga nahimong posible pinaagi sa Agarang Kalinga at Saklolo para sa mga OFWs na Nangangailangan (AKSYON) Funds nga nagtinguha sa paghatag og dali nga suporta sa mga OFWs nga ubos sa krisis.
Ang malampusong pagpatuman sa programa nahimong posible pinaagi sa pakigtambayayong sa Land Bank of the Philippines, Commission on Human Rights, ug DMDP/PESO Cebu City.
Gipasiugda sa DMW RO-VII ang ilang padayon nga pagpakabana sa pagpanalipod ug pagtabang sa mga OFW ug ilang mga pamilya, aron masiguro nga ang ilang mga sakripisyo matubag pinaagi sa madasigon ug malumo nga serbisyo sa gobiyerno. / PR