Nagpahigayon ang Department of Migrant Workers Regional Office VII (DMW RO-VII) sa ilang Mid-Year Performance Assessment (MYPA) ug Re-Planning Exercises kagahapon, Hulyo 29, 2025, sa Golden Prince Hotel and Suites, Dakbayan sa Sugbo.
Gipasiugdahan ang kalihukan pinaagi sa mensahe ni Regional Director Jhoaden “Jao” G. Lucero, MM, EnP, CESO IV, nga nisangyaw sa kamahinungdanon sa maayong pagserbisyo alang sa mga Overseas Filipino Workers (OFWs) ug sa ilang mga pamilya.
Giawhag niya ang tanang kawani sa buhatan nga ipadayon ang ilang paningkamot sa paghatod sa labing maayo nga serbisyo publiko.
Gipresentar sa tagsa-tagsa ka dibisyon ang ilang unang semester nga mga kalampusan lakip na ang pagsusi sa pisikal ug pinansyal nga performance sa tuig 2025.
Gihisgutan sab ang mga isyu ug kabalaka nga naglangkob sa ilang operasyon aron mas mapalambo ang serbisyo sa umaabot nga semester.
Kini nga panagtigom usa ka mahinungdanong lakang aron matul-id ang direksyon sa departamento ug mas mapaayo pa ang mga programa ug inisyatibo alang sa ikaduhang bahin sa tuig.
Ang maong assessment naghatag ug oportunidad sa DMW RO-VII nga mas mapalig-on ang mga estratehiya alang sa padayon nga kalambuan sa sektor sa migrante sa Central Visayas. / PR