SA paningkamot ni Doce Pares Supreme Grandmaster Arnulfo “Dong” Cuesta, mahibalik sa mga barangay sa Sugbo ang eskrima nga katapusang nahitabo niadto pang dekada 70.
Si SGM Cuesta nakigtambayayong sa iyang mga kauban sa grupo aron ibalik kining dalaygong programa sa Doce Pares International.
“We started before in the 1970’s in the barangay level and we are bringing eskrima back to where we started,” opisyal nga pamahayag ni SGM Cuesta kinsa naggunit sa titulo nga Order of Datu Lapu-Lapu (ODL).
Ang ODL ihatag ngadto sa Grandmasters nga nag-edad og 50-anyos o labaw pa ug adunay dakong natampo sa pagpalambo ning lumad nga Pinoy martial art.
Gipasabot ni SGM Cuesta nga kinahanglang ibalik nila ang naandan aron magpadayon ang legasiya sa Doce Pares.
“We see that there are no more barangay-level tournaments and for us to continue Doce Pares legacy, we want to go back to our roots,” dugang ni SGM Cuesta.
Sa pagkaporma sa Doce Pares International kaniadto, natukod ang National Arnis Association of the Philippines (NARAPHIL) ug World Eskrima Kali Arnis Federation (WEKAF) ubos sa pagpangulo ni anhing SGM Diony Cañete, ODL.
Sa inisyal nga lakang kabahin ning maong kalambuan, ipahigayon ang duha ka adlaw nga “Bahug-Bahug sa Mabolo” sugod karong Sabado, Hulyo 5, 2025, sa Mabolo Elementary School (MES) gym.
Mopakita og aksiyon sa kompetisyon mao ang mga puwersa sa Doce Pares Eskrima Academy, Patrod Eskrima Martial Arts Club, Liloan Mixed Martial Arts Club, Labangon Arnis Kali Arnis Club, Hinigaran Arnis Training Center, Bohol Balintawak Arnis Federation, Kritters Marapao Aggression, Doce Pares Orihinal, Eskrima Foundation, Arnis de Caballes Sidlak Loon Arnis Club, World Nickelstick Eskrima Club, Eskrima Cuentada, Eskrima de Abanico-Master Soronio House, Eskrima de Cadena, ug Mabolo Arnis All-Star.
Gipasabot ni SGM Cuesta nga inig labay sa duha ka buwan, ipahigayon ang ikaduhang edisyon niini sa Labangon o Mambaling samtang ang ikatulo sa Lapu-Lapu City.
Ang “Bahug-Bahug sa Mabolo” nga dumalaon nila ni Grandmaster Neon Arcilla ug Senior Masters Gerardo Rusiana ug Alberto Alonto, Jr., gisuportahan sa Philippine Integrated Martial Arts (PIMA) sa New Jersey, USA ug Doce Pares Eskrima Academy. /ESL