Dose ka adlaw na lang ang nahibilin sa dili pa ang May 2025 national ug local elections, subsob nga pagpangandam ang gihimo sa Kabisay-an aron pagseguro nga hapsay ug luwas ang proseso sa eleksyon.
Giseguro na nga luwas ang mga linya sa kuryente samtang ang Department of Energy (DOE) – Visayas Field Office hugot nga nakigtambayayong sa ilang partner agencies aron maseguro nga dili mabalda ang elektrisidad panahon sa eleksyon.
Atol sa Kapihan sa PIA press conference niadtong
Martes, Abril 29, 2025, si DOE Visayas Energy Industry Management Division Supervisor William Carido nipasalig sa publiko nga base sa ilang kasamtangang forecasts, ang rehiyon dunay igong power reserves atol sa mga adlaw ug hangtod sa eleksyon.
Gipasabot ni Carido nga ang eleksyon naatol sa peak summer season, ug taas kaayo ang panginahanglan sa kuryente sa Visayas nga gituohang moabot sa 3,100 megawatts.
Aron sa pagdumala ning taas kaayo nga panginahanglan, ang
DOE nisuspenso sa ilang maintenance activities ug nipalapad sa ilang pakigtambayayong sa mga distribution utilities.
Sa dihang gipangutana kalabot sa posibilidad nga dunay mobuto nga transformer ug dunay masugatan nga load management issues, matod ni Carido nga duna silay mga naka-standby nga team sa emergency crew apil ang electric cooperatives ug private partners.
“We have contingency plans in place with our transmission operators, distribution utilities, and private distribution utilities. One of the key measures is the ILP, which involves large industries, establishments, or participants,” matod ni Carido.
Samtang ang Commission on Elections (Comelec) sa Central Visayas nipahibawo nga 90 porsiyento na silang andam sa pagpahigayon sa eleksyon.
Matod ni Comelec Regional Director Francisco Pobe nga dunay kinatibuk-an nga 16,986 ka electoral board members ug 14,393 ka mga support staff nga ilang palihukon sa tibuok Central Visayas.
Ang rehiyon 7 dunay 2,281 voting centers ug 5,662 clustered precincts.
Apan matod niya nga ang pag-deliver sa mga nahibiling Automated Counting Machines (ACMs) nga kabahin sa kinatibuk-ang 4,000 na-pending pa.
“Let us be positive. Let us level up this activity that people are expecting from us. This activity is not intended only for Region 7, not intended for the Philippines but this is a world activity that needs people to know that we as Filipinos are mature in this electoral activity,” matod ni Pobe. / DPC