DOH 7: 19 na'ng nabutha'g mga pabuto sa C. Visayas

DOH 7: 19 na'ng nabutha'g mga pabuto sa C. Visayas
File photo

Nakatala ang Department of Health (DOH 7) og 19 ka mga kaso sa mga tawo nga nabuthan sa pabuto sa Central Visayas sukad sa Pasko hangtod sa Disyembre 28, 2023.

Sa maong gidaghanon, ang labing daghan nahitabo sa probinsya sa Sugbo, diin walo ang natala.

Dunay upat sa Bohol, lima sa dakbayan sa Sugbo ug tag usa sa Negros Oriental ug dakbayan sa Mandaue.

Tungod niini, ang Cebu Police Provincial Office (CPPO) nanawagan sa mga Sugboanon nga magbantay atol sa pagsugat sa Bag-ong Tuig aron dili mabiktima sa pabuto.

Iyang giawhag ang mga ginikanan nga bantayan ang mga miyembro sa pamilya ilabi na sa mga menor de edad aron dili mogamit sa ilegal nga mga pabuto. Gihulagway hinuon sa kapulisan nga dili alarming ang gidaghanon sa mga nabuthan itandi sa nanglabay nga katuigan.

Matod ni Police Major Windel Abellana, information officer sa CPPO, naghangyo sila sa katawhan ilabi na ang mga dapit nga dili na maabot sa mga polis nga likayan ang paggamit sa pabuto.

Kon ugaling dunay makit-an nga namaligya og ilegal nga mga pabuto, labing maayo nga ipahibawo dayon sa police station aron mahatagan og pagtagad.

TORUTOT

Kon naa pa gihapon ang kinaraan nga pagtuo sa pagsugat sa Bag-ong Tuig nga kinahanglan nga mag saba-saba, labing maayo nga mogamit lang og butang nga maka pasaba sa palibot sama sa takob sa kaldero ug torotot.

“Pwede gyud na siya magamit nga alternative (kaldero) ug katong torotot just to prevent unya maprotektaran pud ilabi na atong batan-on kay sila baya atong ugma,” matod ni Abellana.

Ang Regional Civil Security Unit 7 nipahugot pa sa ilang monitoring sa mga mamaligya og pabuto nga wala gihatagan og pagtugot sa balaod.

Matod ni Police Staff Sergeant Rene Bentulan nga ang mga pabuto nga ilang gibantayan nga dili mabaligya sa mga tawo mao ang Goodbye Philippines nga usa sa nakabiktima sa mga migamit niini karong tuiga.

Kon dunay masakpan nga naninda niini, bisan pag naa kini sa designated firecracker zone sa South Road Properties, ila gyud kini nga pasirad-an ug ikanselar ang permit.

“Among warning ninyo nga kon masakpan mo namo bisag usa lang ka ilegal nga pabuto sama anang Goodbye Philippines amo gyud nang ipasira inyong tindahan,” matod ni Bentulan.

Gipanglantawan nga dag­han ang mogamit og pabuto atol sa pagsugat sa Bag-ong Tuig.

Sa tibuok nasod, mokabat na sa 88 ang mga biktima sa pabuto, ang labing bata nagpanuigon og 4 anyos.

Ang labing daghan og mga biktima nagagikan sa National Capital Region.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph