Nagpadayon ang pagsaka sa temperatura tungod sa pagsugod ning panahon sa ting-init nga grabe ang kainit, gawas sa El Niño phenomenon.
Nunot niini, ang Department of Health Central Visayas (DOH 7) niawhag sa publiko nga magsunod sa mga report bahin sa heat index nga ipagawas matag-karon-ug-unya sa Philippine Atmospheric, Geophysical, and Astronomical Services Administration (Pagasa).
Si Shelbay Blanco, DOH 7 medical officer, nihatag og gibug-aton sa kamahinungdanon sa pagseryuso sa heat index tungod kay naghatag kini og mahinungdanon nga impormasyon sa lebel sa kahasol tungod sa hiniusang kainit ug humidity.
Ang heat index o “feels-like” nga temperatura naghiusa sa temperatura sa hangin ug humidity aron ipakita kon unsa ang kainit nga bation sa lawas sa tawo sa panahon sa ting-init.
FORUM
Si Blanco, atol sa news forum sa Philippines News Agency Central Visayas sa Miyerkules, Marso 6, 2024, niingon nga ang heat index nagpakita sa tubag sa lawas sa kahimtang sa panahon.
Samtang motaas ang temperatura ug humidity, ang abilidad sa lawas sa pagpabugnaw mokunhod, nga nagdugang sa risgo sa mga sakit nga nag-uban sa kainit.
Si Blanco niingon nga ang heat index makahatag og peligro sa panglawas, ilabina sa mga huyang nga grupo sama sa mga tigulang, bata, ug kadtong adunay medikal nga kondisyon.
Ang dugay nga pagkaladlad sa taas nga temperatura mahimo’ng mosangpot sa dehydration, heat cramps, ug bisan sa heatstroke nga hulga sa kinabuhi.
Matod niya nga kon ang heat index gikan sa 27 hangtod 32 degrees Celsius, kini ubos sa kategoriya sa pag-amping. Kini nagpakita nga ang dugay nga pagkaladlad makahimo sa posible nga kakapoy ug padayon nga kalihukan mahimong mosangpot sa cramp.
Tali sa 32 ngadto sa 41 degrees Celsius, ang heat index giklasipikar ubos sa kategoriya nga grabe’ng pag-amping, nagsugyot nga posible ang heat cramps ug heat exhaustion, ug ang dugang nga kalihukan mahimong moresulta sa heatstroke.
Ang heat index makonsiderar nga delikado kon moabot kini sa range nga 41 hangtod 54 degrees Celsius. /