Gipasalig sa Department of Health (DOH) niadtong Sabado, Agusto 10, 2024, nga adunay igong resources ang nasod aron maatiman ang nagkadaghan nga kaso sa leptospirosis.
“Kaya ng health system natin (ang pag-atiman sa mga pasyenteng nag-antos sa leptospirosis),” matod ni DOH spokesperson Assistant Secretary Albert Domingo sa usa ka interbyu sa radyo.
Gisulti niya nga ang DOH mahimong makontak pinaagi sa hotline: landline (02) 8531-0037; mobile number 0920-283-2758 alang sa mga kaso sa leptospirosis.
Si Domingo nanawagan sa publiko nga magpakonsulta sa doktor kon makasinati sila og mga sintomas sa maong sakit nga usa ka bacterial infection nga makuha gikan sa daghang mga hayop, sama sa mga ilaga ug uban pang mga peste.
Ang waste products sama sa ihi ug hugaw sa usa ka hayop nga na-infect, labi na ang ilaga, mahimong makakontamina sa yuta, tubig, ug tanom.
Ang mga sintomas sa leptospirosis naglakip sa hilanat, pagkalipong, pagkalibog, kasakit sa kaunoran, ug sakit sa ulo samtang ang uban adunay lahi nga kasakit sa mga kalamnan sa bitiis, ug pula nga mga mata.
Ang mga grabe nga kaso mahimong adunay jaundice o pagkadilaw sa panit, itom nga ihi, gamay nga pag-ihi, ug grabe nga sakit sa ulo.
Kon walay pagtambal, ang leptospirosis sa tawo mahimong magresulta sa kadaot sa kidney, meningitis o impeksyon sa membrane nga nagapalibot sa utok ug spinal cord, pagkapakyas sa atay, kakulian sa pagginhawa, ug bisan kamatayon.
Ang National Kidney and Transplant Institute (NKTI) nagpasidaan na tungod sa pagsaka sa kaso sa leptospirosis nga gipausab ang ilang gymnasium ngadto sa usa ka leptospirosis ward.
Kini nahitabo human sa kalisod nga dala sa kombinasyon sa Habagat ug Super Typhoon Carina nga hinungdan sa dako nga pagbaha sa National Capital Region (NCR) ug ubang mga probinsya sa Luzon lakip na ang Central Luzon ug Calabarzon. Hangtud sa Biyernes, Agusto 9, 70 ka mga pasyente ang nadawat sa NKTI tungod sa leptospirosis. / SunStar Philippines