DOH: Mga bata pabakunahi na batok sa pertussis, tipdas

DOH: Mga bata pabakunahi na batok sa pertussis, tipdas
File photo

Giawhag sa Department of Health (DOH) ang mga ginika­nan nga pabakunahan ang ilang mga anak tungod sa kabalaka sa pagsaka sa ihap sa nangamatay tungod sa mga sakit nga mapugngan unta pinaagi sa bakuna, labina sa pertussis o whooping cough (gahi’ng ubo) ug tipdas.

Sa usa ka pamahayag, si Health Secretary Ted Herbosa nii­ngon nga ang mga bakuna aron mapugngan kining pertussis ug tipdas walay bayad kon ma-avail sa local health centers.

Ang DOH nagkanayon nga 453 ka mga kaso sa pertussis ang natala sa unang 10 ka semana sa 2024, 1,870 porsyento nga mas taas itandi sa 23 ka mga kaso sa samang panahon niadtong 2023.

Samtang, 52 ra ka mga kaso sa sakit ang natala sa 2019, sa wala pa ang Covid-19 pandemic, 27 sa 2020, pito sa 2021 ug duha sa 2022.

Ang lokal nga kagamhanan sa Quezon City una nang nidekla­rar og pertussis outbreak nga adunay 23 ka kaso nga gitaho niadtong Marso 20, diin upat ka mga pasyente ang nangamatay.

Sa 2023, adunay kinatibuk­-an nga 27 ka mga kaso sa pertussis sa siyudad.

Ang pertussis usa ka mananakod kaayo nga bacterial respiratory infection nga maoy hinungdan sa mga simtomas sama sa trangkaso sama sa ordinaryo nga hilanat, ubo ug sip-on.

“Ang Pertussis o Whooping Cough ay nagdudulot ng matinis at ipit na paghinga matapos ang pag-ubo. Ang bata ay maaaring makaranas ng apnea o pagtigil sa paghinga, pagkahirap sa paghinga, at pagsusuka,”matod sa DOH.

Ang usa ka tawo nga adunay pertussis mahimo’ng makatakod sa 18 pa ka mga indibidwal, lakip ang mga bata.

Ang pagbakuna batok sa pertussis makapugong sa mga komplikasyon sa respiratory.

Ang DOH miingon nga ang naandan nga pagbakuna labi na sa mga bata nabalda tungod sa Covid-19 pandemic.

Apil na niini ang pagbakuna batok sa pentavalent diphtheria, tetanus, hepatitis B, haemophilus influenzae type B, ug tipdas, mumps ug rubella nga tanan walay bayad sa lokal nga mga health center.

Sa 2024, niabot na sa 569 ka mga kaso sa rubella ug tipdas ang natala sa nasod.

Nagkataas ang mga kaso sa DOH sa maong mga sakit sa tanang rehiyon gawas sa Bicol ug Central Visayas. / TPM/SunStar Philippines

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph