Gilaraw sa Department of Health (DOH) nga abagan ang mga doktor ug nurses sa mga district ug provincial hospitals nga giduma sa Kapitolyo isip kabahin sa bag-ong programa sa buhatan nga Bagong Urgent Care and Ambulatory Services (BUCAS) program.
Kini maoy gipahibaw ni DOH-7 Director Dr. Jaime Bernadas atol sa ilang tigom tali kang Cebu Governor Gwendolyn Garcia sa Kapitolyo.
Si Bernadas nagkanayon nga tinguha sa DOH nga makaestablisar og di momenos 28 ka mga BUCAS centers sa tibuok nasod sa 2028 aron masiguro ang paglambo sa healthcare access sa minilyong kabos nga mga Pilipino.
Ang maong center giingong usa ka primary care facility nga susama sa usa ka out-patient department (OPD) nga motanyag og mga libreng tambal ug serbisyo sa mga indigent o labing nagkinahanglan nga mga pasyente.
Matod ni Bernadas nga andam sila mobansay sa mga health professionals aron mas daghan ang mahatagan niini og mas lapad nga serbisyo ang mga Sugboanon.
Sa probinsya sa Sugbo, ang Kapitolyo nag operate sa 16 ka mga hospital nga naglangkob sa upat ka mga provincial ug 12 ka district hospitals.
Ang gobernador, sa iyang bahin, nisugyot nga hatagan og prayoridad sa maong mga programa ang district hospitals ilabi na sa mga isla sa Bantayan ug Camotes.
Nalakip sa unang agenda ni Garcia ang pagpalambo sa mga serbisyo’ng medical ngadto sa kalungsoran sa probinsya sa Sugbo, lakip usab ang paghatag og dugang mga benepisyo sa mga Barangay Health Worker nga maoy moabag sa mga programa sa panglawas sa matag lokalidad.