Sa paningkamot nga palig-onon ang kaluwasan sa trabahoan, gilusad sa Department of Labor and Employment in Central Visayas (DOLE 7) ang ilang Barangay Occupational Safety and Health (BOSH) Patrol niadtong Lunes, Hulyo 1.
Gipangulohan ni DOLE 7 Regional Director Roy Lloren Buenafe ang maong inisyatiba isip tubag sa nagkadaghan nga mga aksidente sa trabahoan sa rehiyon—ilabi na sa sektor sa konstruksyon ug manufacturing.
Labing menos napulo ka barangay sa Cebu City ang nagpadala og mga tanod ug mga representante aron bansayon isip mga local safety officer ubos sa pagdumala sa Occupational Safety and Health Center (OSHC) Region 7, nga gipangulohan ni Engr. Gines Timosa.
Gihatagan og prayoridad sa pagbansay ang mga tanod sa barangay, konsehal, ug mga health worker, ilabi na kadtong gikan sa mga lugar nga nagbalik-balik ang mga aksidente sa trabahoan.
Ang mga barangay nga miapil naglakip sa Talamban, Apas, Lahug, Kamputhaw, Capitol Site, Mambaling, Guadalupe, Mabolo, Inayawan ug Banilad.
Sumala sa datos sa DOLE 7, nakarekord na sila og 42 ka insidente karong tuiga.
Gipasabot ni Buenafe nga kadaghanan niining mga insidente nahitabo sa informal o dili maayo nga pagka-monitor nga mga job site.
“Our goal is to ensure that workers remain safe and healthy in their respective workplaces across Metro Cebu and the rest of Central Visayas,” matud ni Buenafe sa iyang pamahayag.
Ang nabansay nga personnel, nga gitawag na karon og BOSH Patrollers, gilauman nga motabang sa pag-monitor ug pagpalambo sa kondisyon sa trabahoan sulod sa ilang mga komunidad, ug magsilbing mga frontline enforcer sa mga sumbanan sa labor ug kaluwasan sa ilang tagsa-tagsa ka barangay.
Ang programa sa BOSH Patrol kabahin sa mas lapad nga kampanya sa DOLE aron mapugngan ang mga peligro sa trabaho pinaagi sa proactive nga pag-apil sa lebel sa komunidad. / EHP