Subay sa kasaulogan sa Ease of Doing Business (EOBD) month, ang Committee on Anti-Red Tape (Cart) sa Department of Labor and Employment (DOLE) VII nipahigayon og inspeksyon sa mga proseso, programa ug serbisyo sa rehiyonal nga buhatan.
Ang mga miyembro sa Cart nga sila si Lowella Jane Ababan ug Lesvia Marinay nihimo og pasiunang inspeksyon gamit ang checklist sa mga proseso, programa ug serbisyo sa DOLE VII. Kini agi og suporta sa paningkamot sa gobiyerno nga mahimong mas mahigalaon sa negosyo, episyente, transparent ug may tulubagon sa mga lihok niini.
Ang EOBD usa ka selebrasyon nga gilangkuban sa Presidential Proclamation 818 nga giisyu ni Presidente Ferdinand Marcos Jr., niadtong Marso 3, nga nagdeklara sa buwan sa Mayo matag tuig isip Ease of Doing Business month. Ang samang proklamasyon nagmando sa tanang ahensiya ug instrumentalidad sa National Government nga sakop sa R.A. 9485 nga makig-alayon sa Anti-Red Tape Authority (Arta) samtang nag-awhag sa mga naa sa pribadong sektor sa pagbuhat sa ingon.
Alang sa nag-una nga ahensiya, gilusad sa Arta ang selebrasyon niadtong Mayo 5 nga maoy unang selebrasyon sa Ease of Doing Business Month sa nasod.
Si Arta Director General Secretary Ernesto Perez sa usa ka report nga gipatik sa Presidential Communications Office niingon nga ang Ease of Doing Business mao ang labing epektibo nga paagi sa pagbatok sa red tape ug korapsyon sa proseso.
Ang inisyatibo nagtumong sa pagpataas sa kahibalo, pagpasiugda sa mga reporma, ug pagdasig sa kolaborasyon sa mga ahensiya sa gobiyerno, pribadong sektor, ug publiko aron mapasayon ang pagbuhat sa negosyo. / PR