Nadiskubrian ang patay nga dolphin sa mga mangingisda sayo sa Lunes sa buntag, Enero 27, 2025, sa Barangay Zaragosa, Badian, Sugbo.
Matod sa Badian Municipal Environmental Officer (MENRO), Manolito Recopelacion nga ang dolphin nakit-an alas 5:00 sa buntag, oras nga maoy sagad iadto sa mga mangingisda sa dagat.
Ang maong insidente unang gi-report ngadto sa SunStar Cebu ni Badian Tourism Officer Earl Endab.
Matod ni Recopelacion nga ang namatay nga mananap sa dagat, usa ka spinner dolphin.
Duna kini gibug-aton nga gibanabanang motimbang og 18 ngadto sa 20 ka kilo.
Ang mga dolphin maoy naandang talan-awon sa kadagatan sa Badian tungod sa iyang lokasyon nga naalihan ubos sa Tanon Strait.
Sa dihang gisusi, ang dolphin gibanabanang namatay lima ngadto sa walo na ka adlaw ang nilabay tungod kay hinayhinay na kining nagkadugta.
Matod ni Recopelacion, dag-han nang mga dolphin ang napalgang patay sa Badian sama niadtong buwan sa Agusto o Oktubre sa 2023, ug Nobiyembre 21, 2024 sa Lambug beach ug karong bag-o sa Barangay Zaragosa .
Niadtong Dominggo, Enero 26, duha sa tulo ka patay nga dolphin ang nakit-an nga na-stranded samtang tulo ang gibuhian human matambali kay nakaangkon og mga samad didto sa Sitio Pambutan, Barangay Canlargo, Bais City, Negros Oriental. / CDF