Human sa pipila ka mga adlaw gikan sa pag-train niya’g balik ni Filipino boxing legend Manny Pacquiao, gipadayag sa bantugang American trainer nga si Freddie Roach ang iyang pagtuo nga dominahon sa Pambansang Kamao ng Pilipinas si World Boxing Council (WBC) welterweight champion American Mario Barrios sa ilang away karong Hulyo 19, 2025 (US time), sa Las Vegas, USA.
Mao kini ang gipadayag ni Roach sa usa ka interbyu sa www.boxingscene.com.
“And then they asked me, ‘Who do you pick?’ I said, ‘We’re going for one fight. We’re going for the best fight.’ It’s somebody that he (Pacquiao) can dominate. And I think that he can do it,” matod ni Roach.
Nakasulti si Roach niini taliwala sa pangidaron sa 8-division world champion nga 46 ug bisan dul-an na sa upat ka mga tuig kini nga wala nakaaway.
Si Pacquiao katapusang niaway niadtong Agusto 21, 2021 diin napilde siya pinaagi sa unanimous decision batok ni Cuban Yordenis Ugas ug human niini, niretiro na ang Filipino boxing legend.
Adunay mga ningpadayag sa ilang kabalaka kabahin ning pagbalik og away ni Pacquiao apan lahi ang nakita ni Roach, kinsa kapin na sab sa duha ka mga dekada nga nagdumala sa training ni Pacquiao.
Ang panagtambayayong nila ni Pacquiao ug Roach nakahakot na og daghang kalampusan.
Sa laing bahin, gitaho sa World Boxing News nga sugdan na karong Hunyo 3 ang pagbaligya sa mga tiket sa away nila ni Pacquiao ug Barrios nga ipahigayon sa MGM Grand Garden Arena.
Si Pacquiao naggunit og 62-8-2, 39KOs nga rekord samtang si Barrios, kinsa nag-edad og 30, adunay 29-2-1, 18KOs nga rekord. / ESL