Gumikan sa iyang pag-agak kang Melvin Jerusalem aron mahimo’ng world champion, si ZIP Sanman head coach Michael Domingo napili’ng usa sa mga gihatagan og World Boxing Council (WBC) Trainer’s Belt.
Nadawat ni Domingo ang maong bakos niadtong Mayo 9, 2024 sa Midas Hotel sa Manila atol sa official weigh-in sa away nila ni kanhi world champion Marlon Tapales ug Thai Nattapong Jankaew.
“Akong pamati, mura sab ko nahimong world champion. Ang wala nako nakuha kadtong boxer pa ko, akong nakuha karon. Salamat ni Melvin Jerusalem, mao ni resulta sa among grabeng paningkamot,” matod ni Domingo sa interbyu sa Sun.Star Cebu, igsuong buhatan ning mantalaan.
“Nindot kaayo ang feeling nga usa ko sa mga natagaan aning WBC Trainer’s Belt.”
Sa paggiya ni Domingo, nakabaton si Jerusalem og duha ka world titles.
Si Jerusalem unang nakabaton og world title dihang nailugan niya og korona si kanhi World Boxing Organization (WBO) minimumweight titleholder Masataka Taniguchi pinaagi sa second-round stoppage niadtong Enero 6, 2023 sa Japan.
Human niya nabuhian ang WBO belt, si Jerusalem nakalangkat na sab og laing world title pinaagi sa split decision nga kadaugan batok ni Yudai Shigeoka sa ilang WBC minimumweight title fight niadtong Marso 31, 2024, sa Japan.
Ang konsepto sa WBC Trainer’s Belt usa ka ideya ni kanhi WBC president Don Jose Sulaiman, kinsa nipanaw na sa laing kalibutan.
Gisugdan kini pagpanghatag niadtong 2018 diin lakip sa mga nakadawat niini kaniadto mao si Freddie Roach, kanhi trainer ni Filipino boxing legend Manny Pacquiao. / EKA