Human sa halos duha ka tuig nga pahuway, mobalik sa ring si Nonito "The Filipino Flash" Donaire Jr. batok Andres Campos para sa interim World Boxing Association (WBA) bantamweight title sa Casino Buenos Aires, Argentina, Dominggo, Hunyo 15, 2025 (PH time).
Katapusan nga pakig-away ni Donaire Jr. niadtong Hulyo 29, 2023, kontra ni Alexandro Santiago para sa WBC bantamweight title sa Las Vegas, USA, diin napildi siya pinaagi sa unanimous decision. Sa tuig sad nga nag-una, napildi siya ni Naoya Inoue sa Japan pinaagi sa knockout sa ikaduhang round, nga mao'y iyang ikaduhang sunod nga kapildihan.
Sa edad nga 42, suwayan ni Donaire nga papason ang kaugalingong record isip pinakatigulang nga nakadaog og world title sa bantamweight division. Niadtong 2021, nakab-ot niya ang record nga pinakatigulang bantamweight world champion (38 anyos) human niya gi-knock-out si Nordine Oubaali sa Carson, California para sa WBC belt.
Si Donaire usa ka four-division world champion, nakadaog og mga titulo sa flyweight, bantamweight, super bantamweight, ug featherweight divisions. Napildi na niya ang mga dagkong pangalan sa gamayng timbang sama nila Vic Darchinyan, Jorge Arce, Toshiaki Nishioka, Omar Narvaez, Moruti Mthalane, ug Fernando Montiel.
Sa pikas nga bahin, si Campos adunay batan-on nga bentahe — 28 anyos ra siya, 14 katuig ang kalahi sa edad nila ni Donaire. Bisan pa, layo pa sa kasinatian si Campos. Usa ra ka world title fight ang iyang naapilan — niadtong 2023 batok ni Sunny Edwards para sa IBF flyweight title, apan napildi siya sa unanimous decision.
Gikan si Campos sa usa ka ikatulong round nga stoppage win batok ni Jimson Garcia niadtong Abril 12, 2025 sa Chile.
Sa kasamtangan, dala ni Donaire ang rekord nga 42 wins, 8 losses, 28 knockouts, samtang si Campos adunay 17 wins, 2 losses, 1 draw, ug unom ka knockouts.
Ang modaog sa ilang duwa posibleng mosunod nga kontrahon ang magdaog sa title fight tali ni Antonio Vargas ug Daigo Higa alang sa regular WBA bantamweight championship karong Hulyo 30, 2025. / RSC gikan ni EKA