Gilupig ni comebacking fighter Nonito Donaire Jr. ang mas batan-on nga si Andrew Campos pinaagi sa 9th round technical decision aron angkunon ang World Boxing Association (WBA) interim bantamweight title didto sa Casino Buenos Aires sa Argentina ning Domingo, Hunyo 15, 2025 (PH time).
Sa edad nga 42, gipamatud-an ni Donaire nga aduna pa’y nahabilin nga kusog sa iyang tanke.
Naigo og accidental headbutt si Donaire sa ikasiyam nga round nga nagresulta og samad sa iyang tuo nga mata—hapit na kini masira. Tungod niini, gipahunong ang away ug gibase ang desisyon sa scorecards. Ang tulo ka judges nipabor tanan kang Donaire sa iskor nga 87-84 (Ignacio Robles), 87-84 (Jose Roberto Torres), ug 88-83 (Guillermo Perez Pineda).“Sorry that this happened,” sigon ni Donaire sa post-fight interview inside the ring. “I wanted to show my fighting heart and warrior spirit to the people of Argentina. I will do my best the next time. It’s going to be better.”
Nisaka ang rekord ni Donaire sa 43 wins (28 knockouts) ug 8 losses. Posible siya nga makaduwa sa modaog sa title fight ni Antonio Vargas ug Daigo Higa karong Hulyo 30 sa Yokohama, Japan.
Samtang, ang 28-anyos nga si Campos natagak sa 17-3-1, 6 KOs ug posible nga mobalik kini sa flyweight division, diin kaniadto siya nakaduwa alang sa IBF title batok kang Sunny Edwards apan napilde.
Si Vargas (19-1, 11 KOs), nga nirepresentar sa USA sa 2016 Rio Olympics, gi-promote ngadto sa regular champion human si Seiya Tsutsumi sa Japan napakyas sa pagdepensa sa iyang titulo tungod sa kahimtang sa lawas.
Si Donaire karon nakabawi na gikan sa sunod-sunod nga kapildihan batok kang Naoya Inoue ug Alexandro Santiago. / RSC