Gawas ni Manny Pacquiao, adunay laing Filipino boxing legend ang gikatakdang moaway pagbalik human sa taas nga panahon nga pag-undang og away.
Gitumbok mao si Nonito “Filipino Flash” Donaire kinsa makigharong ni Chilean Andres Campos alang sa inilugay sa interim World Boxing Association (WBA) bantamweight title karong Hunyo 15, 2025 (PH time), sa Casino Buenos Aires sa Buenos Aires, Argentina.
Si Donaire kinsa nag-edad og 42, katapusang niaway niadtong Hulyo 29, 2023, diin napilde siya ni Mexican Alexandro Santiago pinaagi sa unanimous decision sa ilang World Boxing Council (WBC) bantamweight title fight sa Las Vegas.
Dili sama ni Pacquiao, si Donaire wala niretiro ug igo lang siyang nipahuway human sa iyang pagkapilde ni Santiago.
Bisan dugay na man tuod siya nga wala nakaaway, si Donaire mao gihapon ang ranked No. 5 sa WBA.
Dihang nag-edad pa siya og 38, si Donaire napatik sa kasaysayan isip labing edaran nga boksidor nga nahimong world champion sa bantamweight division dihang iyang gi-TKO sa 4th round si French Nordone Oubaali sa ilang WBC title fight niadtong Mayo 29, 2021.
Si Campos kinsa nag-edad og 28, kausa pa lang nakaaway alang sa world title diin gipilde siya ni Sunny Edwards sa United Kingdom pinaagi sa unanimous decision sa ilang International Boxing Federation (IBF) flyweight title fight sa England.
Si Campos kinsa kasamtangang ranked No. 8 sa WBA, adunay 17-2-1, 6 KOs nga rekord samtang si Donaire naggunit og 42-8, 28 KOs nga baraha. / EKA, ESL