Wa kapugngi ang All-Star player sa Dallas Mavericks Luka Doncic sa pagkulit og laing triple-double didto mismo sa korte sa Portland Trail Blazers sa Portland, Oregon kagahapon.
Mitali ang all-around player og 40 puntos, 12 rebounds ug 10 assists aron tabangan ang Mavericks sa pagpukan sa Trail Blazers, 131-120, sa NBA regular season game.
Nakahimo na og 30 puntos si Doncic sa first half pa lang ug nag triple-double na kini sa third quarter.
Aduna nay lima ka triple-double si Doncic karon nga season ug 61 sa iyang tibuok NBA career.
Mipuno og 25 puntos si Tim Hardaway Jr., samtang 18 puntos matag-usa si Dante Exum ug Derrick Jones Jr. alang sa Mavericks.
Nangulo sa Portland mao si Anfernee Simons sa iyang 31 puntos, walo ka rebounds ug unom ka assists.