Di pa makolekta sa taga-Department of Public Services (DPS) sa kagamhanan sa dakbayn sa Sugbo ang mga naglaundok nga basura nga naanod sa baybayon sa Barangay Pasil, Dakbayan sa Sugbo, kasugdan lang ang pagkolekta kon molinaw ang kahimtang sa panahon, pamahayag ni John Paul Gelasque, acting head sa Department of Public Services (DPS), atol sa interbyu sa SunStar Cebu pinaagi sa telepono, Sabado, Oktubre 26, 2024.
Siya nipasabot nga dili niya isugal ang risgo sa kinabuhi sa mga personnel sa pagkolekta sa maong mga basura.
Sa dihang gipangutana kon kanus-a atimanon sa DPS ang problema, wala maghatag og tukmang petsa si Gelasque, ug iya kining gipasabot nga kinahanglan nilang unahon ang koleksyon sa basura sa mainland. Iyang giklaro nga dili sila maka-focus sa paghawan sa baybayon samtang ang basura sa mainland wala pa makolekta.
Gidugang pa ni Gelasque nga nagbusy usab ang DPS sa pagpangandam alang sa umaabot nga Kalagkalag sa Nobiyembre 1 ug 2, diin ang ilang mga personnel gipakatap aron manglimpyo sa lainlaing sementeryo sa siyudad.
BARANGAY NGA LEBEL
Matod ni Gelasque nga dili unta mahimong problema ang basura kon sundon lang sa mga residente ang schedule sa koleksyon sa ilang tagsatagsa ka barangay.
Iyang giawhag ang mga barangay kapitan ug konsehal nga hingusgan ang proper garbage collection ug ang pagpahimangno sa matag konstituente sa pagsunod sa husto nga proper disposal sa mga basura.
Matod pa sa opisyal nga adunay mga barangay nga wa mohatag og gibug-aton sa pagsulbad sa problema sa basura tungod kay aduna silay laing priorities. Aduna sab ubang mga barangay nga kuwang o way kaugalingong garbage trucks sa maong sitwasyon andam ang DPS nga mopahuwam og trucks.
Iya sab nga giklaro nga ang mga basura makita sa coastal area sa Pasil wa maggikan sa barangay apan naanod gikan sa mga sapa sa nagkadaiyang dapit.
Wa kauyon si Gelasque sa dihang sila ang basulon og dili ma-segregate ang mga basura atol sa koleksyon, ug gipasabot nga ang pagpatuman sa "no segregation, no collection" nga palisiya usa ka responsibilidad sa barangay.
"Mao nga nangayo ko og tabang sa mga barangay nga palig-onon pa ang ilang koleksyon sa basura ug nga sundon sa ilang mga lumulupyo ang angay nga pamaagi sa paglabay niini," matod pa ni Gelasque.
Ang "no segregation, no collection" nga palisiya dili na bag-o sa siyudad; gipatuman kini panahon sa administrasyon ni kanhi mayor Tomas Osmeña. Ubos sa City Ordinance 2031, nga nagmando sa solid waste segregation gikan sa gigikanan, ang dili biodegradable nga basura kolektahon matag Martes, Huwebes, ug Dominggo, samtang ang biodegradable nga basura kolektahon matag Lunes, Miyerkules, Biyernes, ug Sabado. / JPS