Ang pangulo sa Cebu City Department of Public Services (DPS) nanawagan sa mga kandidato sa eleksyon nga buhaton ang ilang responsibilidad sa pagtangtang sa ilang mga campaign mate-rials sanglit nahuman na man ang eleksyon.
Si DPS head Paul Gelasque niingon nga motabang lang unta ang mga kandidato sa pagtangtang sa ilang mga poster.
“Ang dapat man gud unta, kanang mga nanagan manabang na sila og pangbaklas kon asa sila nagpapilit,” matod ni Gelasque.
Gikumpirma sa pangulo sa DPS nga nagsugod dayon ang pagpanglimpyo pagkahuman sa eleksyon sa Mayo 12, 2025, nga nagpunting sa pagtangtang sa mga basura ug mga poster sa kampanya.
Samtang 30 ka mga garbage trucks ang gipakatap sa tibuok siyudad alang sa pagpanglimpyo sa adlaw sa eleksyon, si Gelasque nakamatikod nga wala kini mapuno sa kapasidad ug wala pa silay tino nga datos sa gidaghanon sa mga basura nga nakolekta atol sa eleksyon.
Gisugdan sa DPS ang pagpanglimpyo sa mga eskwelahan nga nagsilbing polling precinct, gikan sa alas 6:30 sa gabii. sa Lunes, Mayo 12, ug nagpadayon sa tibuok gabii.
Niadtong Miyerkules, Mayo 14, si Gelasque niingon nga ang ila na sab nga tumong karon mao ang pagbungkag sa mga campaign posters nga giplastar sa nagkalainlaing lugar sa dakbayan.
Kini nga buluhaton gilauman nga magpadayon hangtod sa Biyernes, Mayo 16.
Gikasubo ni Gelasque nga ang mga kandidato wala motabang og limpyo pagkahuman sa eleksyon, hilabi na sa mga lugar nga gibutangan nila og mga campaign posters.
“Mao nang dili namo isalig ang kana nga tahas, kondi kami na lang ang mi-step-up sa DPS,” matod ni Gelasque.
“Dili na mi kailangan mupaabot nila, magsugod na lang mi. Lisod kaayo nga among isalig ang trabaho sa mga tao nga dili maoy ilang mandate,” siya nidugang.
Niingon si Gelasque nga ang mga nahipos nga campaign materials direktang ihatod sa landfill area.
“Mahug man siya nga basura kay ang uban crumpled na. So, deritso na namo isakay sa truck, ilabay na didto sa final waste disposal site nato,” sumala ni Gelasque. / JPS