Giklaro sa Department of Public Works and Highways (DPWH) 7 nga dili lang usa ka kontraktor ang nag-operate sa nagkadaiyang proyekto Sugbo ilabi na sa flood control projects sa kagamhanan.
Kini maoy gipahibalo ni DPWH 7 Regional Director Engr. Danilo Villa Jr. sa Martes, Agusto 12, 2025.
Taliwa kini sa pagkalambigit sa kontraktor nga QM Builders nga nakaangkon sa ikaupat nga pwesto sa labing daghang flood control projects nga gidumala sa Sugbo.
Matod sa direktor, ang gipagawas nga listahan ubos sa sumbongsapangulo.ph wala pagpasabot nga duna silay kalapasan nga nahimo.
Apan kini gipasusi aron masiguro nga nahuman ug nakompleto ang mga proyekto.
“Mini-make mention itong mga contractors nationwide na nakakuha ng mga malalaking kontrata ay hindi naman po tinutukoy nya [Presidente Ferdinand Marcos Jr.] na mayroong ginawang hindi po maganda,” matod ni Villa.
Subay sa giluwatang datos sa DPWH, adunay 576 projects na ang nakompleto sa Rehiyon 7 niadtong 2022-2024 diin nalakip pa niini ang isla sa Negros.
Samtang 382 ka proyekto sab ang padayon pa nga gihuman sa ahensya. Apan wala giklaro kon unsa nga mga proyekto.
Ang maong mga proyekto gitagan-an og pundo nga moabot sa P73 bilyunes.
Kahinumdoman nga sa giluwatang datos sa portal sa presidente, adunay 414 ka flood control projects ang natala nga nakompleto na sa Sugbo.
Kini bisan pa man og wala malakip ang Sugbo sa Top 10 flood prone areas lukop nasod.
Si Villa kauban ang sakop sa DPWH 7 gikatakda nga mopresentar sa kahimtang sa proyekto sa Sugbo.
Lakip na ang ilang mga yangungo, rekomendasyon, ug reports ngadto sa kongreso karong adlawa. / ANV