Paningkamutan ni Mayor-elect Thadeo “Jonkie” Ouano nga sulbaron ang dugay nang problema sa baha sa Dakbayan sa Mandaue ilabi na sa mga dapit nga sagad gibahaan sama sa A.S. Fortuna ug Barangay Tipolo.
Giklaro ni Ouano nga bisan og di siya mosaad, mipasalig siya nga buhaton ang tanan aron mapalambo ang sistema sa drainage sa siyudad.
“Dili ko ganahan mo-promise og butang nga basin dili nato matuman, kay balikan gyud ta sa katawhan ana. Pero paningkamutan gyud nato nga ma-improve ang drainage system, labi na sa A.S. Fortuna og Tipolo kay dugay na gyud ni nga problema,” matod ni Ouano atol sa iyang pagpanumpa niadtong Lunes, Hunyo 9, 2025.
Ang Mandaue makig-alayon sa nasudnong kagamhanan, ilabi na sa Department of Public Works and Highways (DPWH), aron masiguro nga ang lokal ug nasudnong mga plano sa drainage magkahiusa.
Pangandam
Ang Mandaue City nangandam alang sa umaabot nga ting-uwan pinaagi sa usa ka komprehensibo, multi-agency nga pamaagi nga gidesinyo aron makunhoran ang epekto sa posibleng baha.
Ang City Disaster Risk Reduction and Management Office (CDRRMO), ubos sa pagpangulo ni Miguel Lumapas, executive secretary sa City Mayor’s Office, nagpatawag og tigom niadtong Biyernes, Hunyo 13, 2025.
Lakip sa nanambong mga opisyal gikan sa Philippine National Police (PNP), Bureau of Fire Protection (BFP), ug nagkalainlaing departamento sa city hall.
Ang tigom nagtutok sa mga pagpangandam gikan sa barangay level ngadto sa mga pagpalambo sa imprastraktura sa tibuok siyudad. / Trixcy Shien Cobarde, Benedicto College Intern