Drainage sa SRP nasampungan
Si Cebu City Mayor Michael Rama nisulti sa mga enhinyero ug management sa Filinvest Land, Inc. (FLI) ug Citi de Mare (CDM) personnel sa pagpahigayon og massive desilting initiative, tangtangon ang mga babag sa nagpadayon nga pagpalambo sa drainage system sa palibot niini sa South Road Properties, kay ang maong propyedad gikonsiderar nga flood prone area sa panahon sa kusog nga pagbunok sa ulan
Sila si Rama uban ni Gwen Sala, general manager sa CDM ug ni Engineer Neil River Lucero, construction manager sa CDM, John Paul Escario, area general manager sa FLI, ug SRP Administrator Roberto Varquez, nangulo sa ocular inspection ug assessment sa sayo sa buntag sa Martes, Oktubre 17, sa nagpadayon nga drainage improvement projects sa palibot sa City de Mare sa El Pardo road sa South Road Properties (SRP).
Ang mayor nihatag og deadline nga sa dili pa ang iyang adlaw nga natawhan o Oktubre 28, 2023, ang desilting ug clean-up initiative mahuman, samtang gitanyag ang mga empleyado sa City Hall nga motabang sa inisyatiba sa Oktubre 21, 2023.
Nadiskubrehan ni Rama ang grabe nga pagbabag sa dakong deposito sa yuta sa daplin sa drainage, human niya gimando ang pag-alsa ug pag-abli sa pipila ka mga manhole cover, diin nikanaog pa siya aron pag-obserbar sa sitwasyon ilawom sa culvert.
Ang presensya sa nakasampong nga mga yuta maoy usa sa mga hinungdan sa pagsuyla sa tubig sa kadalanan ug mga propyedad sa duol atol sa dakong pagbunok sa tubig sa ulan, matod ni Rama.
Gisusi usab sa mayor ang pagbutang og dugang nga box culvert duol sa CDM nga nagsilbing dugang drainage channel, diin ang proyekto andam nga mahuman sa hinapos sa semana.
Kon mahuman na, mas paspas ang pag-agos sa tubig gikan sa kusog nga pagbunok sa ulan gikan sa CDM paingon sa Inayawan creek inay sa naandan nga pag-agos sa tubig paingon sa main drainage diretso sa Cebu Strait.
Sa wala pa ang inspeksyon, si Lucero nitug-an sa mga tigbalita nga bag-o lang niadtong Hulyo ning tuiga ang CDM ug mga kasikbit nga mga propyedad nakasinati og pag-awas sa tubig sa ulan gikan sa drainage main.