Mahibal-an na sa Gilas Pilipinas kon unsa nga team ang makaatbang niini sa pagpahigayon sa pormal nga draw sa teams alang sa 2027 FIBA World Cup qualifiers karong Martes, Mayo 13, sa Al Hazm sa Doha, Qatar.
Matod ni Samahang Basketbol ng Pilipinas (SBP) Executive Director Erika Dy, si Gilas deputy coach Sean Chambers ang motambong sa draw isip representante sa men’s national team.
"Coach Sean Chambers will be representing us to the draw," sigon ni Dy.
"We still don't know if we're playing home or away. We don't know which bracket we belong to and kung sino ang makakalaban natin,” dugang niya.
Ang tanang 16 ka teams nga nakaapil sa FIBA Asia Cup sa Jeddah, Saudi Arabia niadtong Agusto mopartisipar sa World Cup qualifiers nga magsugod karong Nobiyembre.
Ang seeding sa teams gianunsyo niadtong niaging semana ug gibase sa ilang FIBA world rankings ug geographical location.
Ang Pot 1 gilangkuban sa Australia ug Japan, Pot 2 ang Iran ug Lebanon, Pot 3 New Zealand ug China, Pot 4 Jordan ug Saudi Arabia, Pot 5 Pilipinas ug Korea, Pot 6 Syria ug India, Pot 7 Chinese Taipei ug Guam, ug Pot 8 ang host Qatar ug Iraq.
Sa maong seremonya, usa ka team matag pot ang pilion aron mahibal-an ang groupings. / RSC