Giataki sa iyang sakit ang 73 anyos nga lalaki nga nagmaneho sa sports utility vehicle (SUV) sa dalan F.F. Zuelig eskina sa A. Soriano Avenue, Barangay Centro, dakbayan sa Mandaue, Martes, Disyembre 19, 2023, hinungdan nga nabangga kini og laing mga sakyanan hangtod sa nahunong dihang nabangga sa ali sa dan.
Si Lieutenant Colonel Franco Rudolf Oriol, deputy director for administration ug spokesperson sa Mandaue City Police Office (MCPO), niingon sa Miyerkules, Disyembre 20, nga base sa ilang imbestigasyon, ang 73-anyos nga motorista nag-antos sa hypoglycemia o ubos nga blood sugar ug nawad-an siya sa panimuot.
Sa video, ang SUV nakit-an nga niliko sa karsada niadtong Martes, nga naigo sa daghang mga traffic cone ug usa ka taxi, pagkahuman hingpit nga nigawas sa karsada ug naigo sa usa ka sapinit.
Ang 73 anyos nga nagmaneho sa Mitsubishi Pajero giila sa kapulisan nga si Edelizo Pilones, taga lungsod sa Liloan.
Si Oriol niingon nga gawas sa taxi, ang SUV nakabangga usab og mga pribadong sakyanan, lakip ang duha ka mga bisikleta.
Matod niya, usa sa mga anak ni Pilones ang nakig-estorya sa tanang biktima ug nisaad nga bayran ang danyos kon makagawas na sa tambalanan ang iyang amahan.
MGA ANGOL
Naangol ang duha ka mga nagbisiklita nga sila si Amado Lebumpasil, 49, ulitawo, ug Antonio Rebuyas Pretela, 59, minyo, pulos taga Purok Lemonsito, Barangay Umapad, Mandaue.
Laing mga sakyanan nga nadasmagan apan way naangol mao ang Toyota Innova wagon nga gimaniho sa 46 anyhos nga usa ka lalaki nga taga Palmera Homes, Barangay Basak, Mandaue ug ang Toyota Vios Sedan mga gimaneho sa 46 anyos nga lalaki nga taga lungsod sa Pinamungajan.
Laing Toyota Innova wagon nga nabanggan, gimaneho sa usa ka 34 anyos nga lalaki nga taga Barangay Banilad, Mandaue ug ang Kia nga sakyanan nga gimaneho sa usa ka 35 anyos nga lalaki nga 35 anyos nga taga Guinacot, siyudad sa Danao.
Lakip usab ang Toyota FJ Cruiser nga gimaneho sa usa ka 28 anyos nga taga Barangay Cambaro, Mandaue.
Atol ning pagsuwat, ang MCPO wala pa makahuman sa pagsubay sa kinatibuk-ang danyos sa aksidente.
TAMBAG
Si Oriol nitambag sa senior citizens ug kadtong dunay medikal nga kondisyon, dili mokompiyansa sa pagmaneho og sakyanan ug mas maayong dunay laing momaneho niini aron paglikay sa aksidente.
Gawas pa, mabalda ang dagan sa trapiko sama sa nahitabo sa Martes dihang giataki ang maong senior citizen.