Nimando ang Land Transportation Office (LTO) sa pagbakwi sa lisensya niadtong SUV driver nga responsable sa kamatayon sa duha ka tawo sa dihang nilahos ang iyang gimanehong sakyanan sa Terminal 1 sa Ninoy Aquino International Airport (NAIA), Pasay City, sayo ning buwana.
Matod ni LTO chief, Assistant Secretary Atty. Vigor Mendoza II, ang drayber suspek napamatud-an nga guilty sa reckless driving ug gipahamtangan og silot nga sud sa upat ka tuig dili makamaneho human gibakwi ang lisensiya ug ang pagpabayad og multa nga P2,000.
Ang maong insidente nahitabo niadtong Mayo 4, diin namatay ang kuwatro anyos nga batang babaye nga igo lang unta naghatod sa iyang amahan nga OFW uban sa iyang inahan nga naangol sab.
Laing namatay mao ang 28 anyos nga lalaki nga pasahero nga gikatakda mobiyahe abroad alang sa usa ka business trip human naligsan sa maong SUV.
Ang drayber suspek usa ka 47 anyos nga lalaki nga taga-Batangas.
Gipasakaan kini og kaso nga reckless imprudence resulting in homicide, multiple physical injuries, ug damage to property.
Nakagawas ra sab ang suspek human kini nakapiyansa. / TPM (SunStar Philippines)