Drayber nasakpang mipasuyop og krudo

Drayber nasakpang mipasuyop og krudo
SunStar Local News GPX

Drayber sa usa ka construction company gipadakop human matod pa masakpi sa akto nga nangawat og krudo sa tanke sa iyang gimaneho nga mixer truck gamit ang hose.

Kini nahitabo sa luyo nga bahin sa usa ka unibersidad sa dalan S. Osmeña, Barangay San Roque, dakbayan sa Sugbo sa alas 12:05 sa Biyernes sa kaadlawon, Mayo 3, 2024.

Ang suspek giila nga si Ariel Sara Cadiente, 34, taga dakbayan sa Dumaguete apan lumad nga taga Alanghilan, Manjuyod, Negros Oriental ug drayber sa mixer truck sa Dakay Construction.

Sa imbestigasyon sa Waterfront Police Station nasuta nga naabtan, matod pa, ang suspek sa duha ka roving guards sa maong construction company, nga gipasuyopan og krudo ang iyang gimaneho nga mixer truck gamit ang hose ug gisulod sa galon sa mineral water.

Gibana-bana nga moabot sa 18 ka litro ang nakuha sa suspek nga mobalor og kapin sa P1,000 nga gi turnover usab ngadto sa kapulisan.

Giangkon sa suspek nga nasakpan siya nga nangawat sa krudo apan iyang gipasabot nga iya unta kadto ihatag sa iyang uyoan nga usa usab ka driver nga magbiyahi-an paingon sa Negros ug hulipan lang inig balik.

“Mao pa to nako nahimo. Ako man unta to ihatag sa akong uyoan nga mobiyahe paingon Negros unya ilisdan lang inig balik nila,” matod ni Cadiente.

Duha na ka tuig nga nagtrabaho isip driver sa mixer truck sa Dakay Construction si Cadiente ug karon lang siya nakahimo og sala.

Nangayo siya og pasaylo sa kompaniya ug nipasalig nga dili na niya kini buhaton sanglit duna siyay anak nga masuso pa sa Dumaguete City.

“Nagmahay gyud ko. Nanghinaut lang ko nga maluoy sila nako. Naa pa tawon koy gagmay’ng bata, ako ra tawon gisaligan sa panarbaho,” matod ni Cadiente.

Kasong qualified theft ang giandam nga kaso sa Waterfront Police Station batok kaniya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph