Patay nang nalandig sa tambalanan ang drayber sa motorsiklo, samtang naangol ang iyang angkas nga pag-umangkon sa nahitabong aksidente sa may national highway sa Barangay Poblacion, Lungsod sa San Remigio, Sugbo sa alas 9:45 sa gabii sa Dominggo, Marso 16, 2025.
Ang namatay giila nga si Reggie Pabellon, 35 anyos, samtang naangol ang angkas niini nga 15 anyos nga dalagita kinsa pulos taga Lungsod sa San Remigio.
Sa follow-up sa Superbalita Cebu, nasayran nga kusog nga nagpadagan si Pabellon padulong mopauli gikan sa Siyudad sa Bogo, apan pag-abot sa eskina sa Barangay Poblacion diin nahimutang ang usa ka convenience store, kalit nga nigawas ang usa ka Toyota Hi-lux nga gimaneho ni Benjie Mantos Japitan, 44 anyos, minyo nga taga Purok Chico, Barangay Victoria, San Remigio hinungdan nga nabangga ang motorsiklo.
Tungod sa kakusog sa impact, nakaangkon og grabeng kadaut sa lawas ang mga biktima kinsa gidali pagdala sa Bogo City Provincial Hospital, apan si Pabellon ang gideklara nga dead on arrival sa attending physician nga si Dr. Nicolai Belandres.
Ang drayber sa Hilux kasamtangang gikustodiya sa San Remigio Police Station.
Kasong reckless imprudence resulting to homicide, physical Injury and damage to property ang atubangon niini. / DVG