Patay nang nadangat sa tambalanan ang usa ka nagmaneho og motorsiklo human nibangga sa usa ka awto, alas 5:13 sa buntag, Dominggo, Marso 17, 2024, sa atubangan sa usa ka mall sa Brgy. Pajac, siyudad sa Lapu-Lapu.
Ang namatay nga drayber sa motorsiklo giila nga si Roger Cavan Valiente Jr., 30, minyo, ug taga Sityo Abuno, Brgy. Pajac, Lapu-Lapu.
Samtang ang nagmaneho sa awto nga Toyota Vios nga nadasmagan sa biktima mao si Norhan Inrahim Manonggiring, 24, ulitawo, ug taga Matumbo, Pusok, Lapu-Lapu.
Base sa imbestigasyon ni Police Chief Master Sft. Rheymund Sosmeña, traffic investigator sa kapulisan sa Lapu-Lapu, nasayran sa Superbalita nga ang nagmotorsiklo nitadlas sa dapit ug ni-overtake kini sa gisundan nga laing motorsiklo.
Ug matod pa, nikawas na kini sa pikas lane hinungdan nga gikasugat ang awto nga niresulta sa disgrasya human ang motorsiklo misungag sa unahan sa awto.
Tungod sa kakusog sa impact, ang biktima nakaangkon og grabing kadaot sa lawas ug gidala sa Mactan Doctors Hospital apan gideklarar kini nga dead on arrival (DOA) sa doktor.
Ang drayber sa awto gikustodiya sa traffic police sa Lapu-Lapu alang sa dugang imbestigasyon sa kaso. / DVG