Patay ang drayber sa motorsiklo human nabanggaan sa gikasugat nga sakyanan sa national highway sa Brgy. Pandacan, lungsod sa Pinamungajan, alas 12 sa Huwebes sa gabii, Hunyo 13, 2024.
Si Remigio Candole Bagahansol Jr,. 33, minyo, nagpuyo sa dapit, dead-on-arrival (DOA) sa tambalanan tungod sa grabeng pagkaangol.
Timailhan sa grabe nga impact, nabungkag ang iyang motorsiklo. Gitanggong ang drayber sa Ford Ranger Wild Track nga si Rissa Lauron Corea, 43, minyo, taga Brgy. Tajao, Pinamungajan.
Sa imbestigasyon ni Police Major Gilfred Baroman, hepe sa Pinamungjan Police Station, nipakita nga si Corea nilapas sa pikas lane sa karsada ug gikasugat ang biktima busa nadaro ang motorsiklo. / GPL