Patay ang drayber sa motorsiklo nga dunay sidecar human nabanggaan sa usa ka sedan sa highway sa Barangay Tubigakmanok, lungsod sa Asturias, alas 5:40 sa hapon, Sabado, Agusto 17, 2024
Usa ka Suzuki S-Presso nga gimaniho ni Ramil Noel Mondreza, 47, minyo, ug taga Purok Rizal 1, Barangay Tubigagmanok, Asturias, maoy nalambigit sa panagbangga.
Ang namatay mao si Rave Joel Mata, 24, ulitawo, ug taga Barangay New Bago, Asturias, kinsa gideklarar nga dead on arrival sa mga doktor sa Balamban District Hospital.
Si P/Master Sgt. Gilmer Noval, imbestigador sa Asturias Police Station nga nahinabi sa Superbalita Cebu, niingon nga ang Suzuki paingon sa norte nga bahin sa probinsiya ug gikasugat ang motorsiklo nga gisakyan sa biktima.
Sa imbesigasyon sa kapulisan, ilang nasuta nga ang biktima way lisensiya sa pagmaneho si Mata ug kusog nga nakapadagan sa kurbadang karsada. Nawad-ad kontrol sa manobela busa nikawat sa pikas habig sa karsada busa nakabangga ang sedan,
Tungod sa kakusog sa impact sa bangga, nilupad ang biktima ug didto kini nitugpa ug nabunal sa poste.
"Ang driver sa sakyanan nakakita nga mipadulong niya ang gisakyang motor, pero sa ka kusog mitakilid milahos sa pagbanga," dugang ni Noval.
Ang drayber sa sedan gitangong sa kapulisan ug nagpaabot sa kasong ipasaka batok kaniya. / GPL