Gipasakaan na og kasong murder ngadto sa Cebu City Prosecutor’s Office sa Huwebes, Pebrero 8, 2024, ang drayber sa sports utility vehicle (SUV) nga Mazda nga gilambigit sa hit and run sa Queens Road, Barangay Kamputhaw, dakbayan sa Sugbo niadtong Dominggo sa buntag, Pebrero 4, 2024.
Subay sa nakuha nga dokumento sa Superbalita Cebu, ang reklamante mao si Bernadeth Lao Larumbe, inahan sa biktima nga si Jeslar Uriel Larumbe, 23, usa ka basketball player, taga Dan Tres de Abril, Brgy. Labangon, dakbayan sa Sugbo.
Ang gikiha mao si Aaron Karl Tan, hamtong, usa ka negusyante, taga Barangay Guadalupe, kinsa gihinganlan sa kaso nga nagmaneho sa SUV nga kolor gray nga naka-blinker ug nagwangwang dihang nakabangga sa biktima.
Matod ni Police Colonel Ireneo Dalogdog, hepe sa Cebu City Police Office (CCPO), nasubay ang SUV tungod sa pagtaho sa mga saksi.
“Nakompleto na ang atong imbestigasyon regarding atong panghitabo niadtong miaging Dominggo (Peb. 4) involving vehicular accident nga hit and run. Ug karong adlawa (Peb. 8) ato nang i file ang kaso nga murder..” , matod ni Dalogdog.
Si Police Lieutenant Colonel Gerard Ace Pelare, usa usab ka abogado ug spokesperson ni Police Brigadier General Anthony Aberin, hepe sa Police Regional Office (PRO 7), nagkanayon nga gipasaka ang kaso pinaagi sa regular filing sanglit dili na mamahimong dakpon ang suspek.
Nagpasabot kini nga moagi ang maong kaso sa preliminary investigation ug hatagan og panahon nga makatubag ang giakusahan sa krimen.
Kon dunay makita nga probable cause ang piskaliya, ila kining isang-at sa korte.
Apan gitug-an ni Pelare nga base sa pagpasabot kaniya sa CCPO, lig-on ang mga ebidensya nga gihuptan sa kapulisan ilabi na nga daghan ang ningpatim-aw nga mga saksi, kansang mga pamahayag nitakdo sa mga kuha sa mga CCTV camera.