Driver sa awto nga nakatulog nibangga sa gikasugat niini nga motor sa Transcentral Highway (TCH ) sa Sityo Hi-Way, Barangay Pung-ol, Dakbayan sa Sugbo alas 8:48 sa buntag, Sabado, Hulyo 26, 2025.
Ang driver sa motor nga grabeng naangol naa sa tambalanan sa Siyudad sa Sugbo, giila nga si James Cairo, 40 taga Tipolo, Siyudad sa Mandaue.
Ang nakabangga mao ang usa ka SUV nga gimaneho ni Michael John Cabonita, 23, taga Arpili, Lungsod sa Balamban.
Sa imbestigasyon sa Traffic Enforcement Unit sa Cebu City Police Office nasayran nga nagsubay sa managlahi nga direksyon ang duha ka sakyanan ug ang motor padong sa Balamban samtang ang SUV padulhog sa Dakbayan sa Sugbo.
Apan pag-abot sa maong lugar nakatagpilaw ang nag-drive sa auto ug nisubay sa laing lane sa karsada.
Tungod kay wala na maka-maneuver human nga makatagpilaw ug sa kakusog sa iyang dagan, nabangga ang nakasugat nga maoy hinungdan sa pagkaangol sa driver sa motorsiklo.
Tungod sa kakusog sa impact ang driver sa motorsiklo nga si Cairo nalagpot ug nalabay sa gutter kilid sa karsada.
Kasamtangan nga gikustodiya sa TEU ang driver sa SUV nga si Cabonita ug giandam na ang kasong Reckless Imprudence Resulting in Damage to Property and Severe Physical Injury. / AYB