Nilanat ngadto sa unom ka oras una naugkat ang drayber sa trak nga na-trap sud sa iyang gimaneho nga dump truck nga nalimbuwad.
Wa lung-i sa mga sakop sa Alcantara Rural Health Unit, Disaster Risk Reduction Management Office, Bureau of Fire Protection ug Alcantara police nga gipangulohan ni P/Capt. Analiza Sarte ang pag-rescue sa biktima nga si Milky Miot, hamtong, taga Samboan, habagatang Sugbo.
Ang trak de karga nga gimaneho ni Miot naatrasan sa nag-una nga 10-wheeler truck sa Sityo Cabaray, Brgy. Lawaan, Alcantara, sa alas 10:15 sa buntag, Pebrero 13, 2024.
Ang 10-wheeler truck nga nakaatras gimaneho ni Reynaldo Panit Tribunalo, 46, minyo, taga Lamisa , Balamban nga nagkarga og balas.
Ang trak sa biktima nagsunod kang Tribunalo.
Pag-abot sa tungason kaayo nga bahin, naglisod sa pag-abante ang trak ni Tribunalo, hayan tungod sa kabug-at sa karga niini.
Niatra ug naigo ang trak sa biktima nga niresulta sa pagkalimbuwad niini tungod sa kakusog sa impact.
Naluwas ang truck boy helper ni Miot nga si Jervin Camus, 35, taga City of Naga, habagatang Sugbo.
Atol sa gihimong rescue operation, gitauran og oxygen tank ug dextrose si Miot nga diha pa sud sa sakyanan sa dihang giabli ang dulong nga bahin sa truck aron pagkuha kaniya.
Si Tribunalo kasamtangan nga gikustodiya sa Alcantara police samtang gihikay ang pakig-settle sa hitabo tungod kay disgrasya man.