Aron palig-unon ang healthcare services sa tibuok Probinsiya sa Sugbo, gitinguha sa kagamhanan ang pagpalapad sa kahibalo sa Basic Life Support (BLS) training dili lang sa mga health personnel apan lakip ang hospital employees, mga ambulance driver, utility workers, administrative staff, ug mga security guards.
Sa Miyerkules, Hulyo 23, 2025, gitagbo ni Public Health Consultant Dr. Nikki Catalan ang tanang Chiefs of Nurse sa 16 ka mga hospital nga gidumala sa Lalawigan sa Sugbo.
Ang maong tigom nagtinguha nga madunggan ang mga yangungo sa nursing leaders sa tagsa-tagsa niini ka mga hospital.
Lakip na ang dinalian nga panginahanglan sa mga nursing staff, pagpalit ug pag-upgrade og dugang ekipo, ingon man ang pagpatuman sa training programs sa bag-ong healthcare initiatives.
“Our Chiefs of Nurse have never been formally met or heard before. This meeting is only the beginning, we recognize the need for consistent dialogue, especially since we were not given a comprehensive transition from the previous administration,” matod ni Catalan sa Hulyo 23.
Dugang ni Catalan nga dako og ikatabang sa hospital system ang mga nursing personnel aron mahatagan sa insaktong pag-atiman ang mga pasyente, masunod ang health protocols.
“We recognize the dedication of our Chiefs of Nurse and will work together to address the gaps and further improve healthcare services across Cebu”, sigon ni Catalan. / ANV