Driver ‘gikawatan’ og P7K sa babaye nga sexy

Driver ‘gikawatan’ og P7K sa babaye nga sexy
SunStar Mandaue City

Driver sa E-taxi gikuotan sa i­­yang pasahero nga iyang gi­hulagway nga batan-on, mu­bo og shorts ug sexy ang lawas.

Nireklamo sa sibyaanan dyHP si alyas Nick, 58, driver, taga Brgy. Pagsabungan, Dakbayan sa Mandaue City, human gikawatan og P7,000 nga iyang tinigom alang sa iyang contribution sa Social Security System (SSS) niadtong Hunyo 13, 2024, alas 10 sa gabii.

Matod ni Nick nga nisakay niya ang maong babaye sa may Happy Valley, duol sa buhatan sa Court of Appeals.

Nagpahatod kini sa may buhatan sa National Police Commis­sion (NAPOLCOM) sa N. Bacalso Avenue, Dakbayan sa Sugbo.

Samtang nagdagan ang taxi, nag-estoryahanay ang duha hangtod nga nanghagad ang babaye nga moadto sa usa ka bar aron “mag happy happy” apan iyang gibalibaran kay wa siyay hilig.

Pag-abot sa destinasyon, nibayad ang sexy nga babaye sa nagpatak sa taxi nga P90 ug dayon nigawas. Apan sa dihang nakadagan na siya og pila ka metros, iyang nakita ang iyang pitaka nga naa na sa salog sa taxi sa atubangan human ni nahayagan sa suga sa poste.

Paghiling pa niya sa pitaka, wala na kini sulod ug nawagtang na ang iyang kwarta nga P7,000.

Nidali siya og atras sa sakyanan apan wala na niya maabti pa ang sexy nga babaye. Iya ning gipahibawo sa iyang mga kaubang taxi driver ug gihulagway niini ang maong babaye.

Dinhi iyang nahibaw-an nga dili lang diay siya ang nabiktima nga driver.

Usa sa mga taxi driver nipakita kaniya sa hulagway sa usa ka babaye nga gi post sa Facebook page sa grupo sa mga taxi driver sa Sugbo kon mao ba kini ang nibiktima kaniya.

Positibo kini nga ang naa sa hulagway maoy nikuha sa iyang kwarta.

Daghan na nga mga taxi driver ang nabiktima sa maong ba­baye nga gusto ni Nick nga madakpan sa kapulisan aron wala nay taxi driver nga mabiktima.

Target sa maong babaye ang mga taxi driver, diin inig sakay mang­hagad og sulod og night club.

Samtang magdagan ang taxi, mokalit kini og halog sa driver labi na niadtong motubay sa iyang estorya ug manguot sa bilahan niini. Dili makabantay ang driver nga gikuha na diay ang pitaka ug dayong naog diin diha na mabantayan nga nawala na iyang kwarta. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph