Namatay ang usa ka driver human gipauwanan og mga bala ning bag-uhay lang sa Upper Tikoy Brgy. Bogo, Lungsod sa Argao, Cebu.
Si Joseph Mier Narredo, 39, nakaangkon og mga samad pinusilan sa kalawasan dihang nakit-an sa iyang kapuyo nga si Ednalyn Padernal Santiago, 32.
Sa pag-abot sa kapulisan sa lugar, ang biktima gidala na sa Argao Rescue personnel sa Isidro Kintanar Memorial Hospital.
Apan ang biktima gideklarar sa mga doktor nga dead-on-arrival (DOA).
Sa imbestigasyon sa Argao Police Station, ang kapuyo nga si Ednalyn nibutyag nga diha siya sa sulod sa ilang panimalay nag-andam sa ilang panihapon.
Sa dihang nipaingon siya sa kusina aron mokuha’g kan-on, nakugang siya kay nagbuy-od na man ang biktima nga nagkadugo ug wala’y panimuot.
Misinggit si Ednalyn sa pagpangayo og tabang.
Ang kapulisan sa Lungsod sa Argao nagpadayon sa ilang hot pursuit operation.
Aduna na silay gisubay nga pangalan sa tawo nga posibleng naay kalambigitan sa krimen. / GPL.
