Gipatawag sa Land Transportation Office (LTO 7) ang drayber sa usa ka modern public utility jeepney (MPUJ) human sa usa ka insidente nga walay pagpakabana sa iyang pagmaneho nga nakuhaan og video sa usa ka media personality sa Siyudad sa Sugbo.
Ang drayber ug ang operator sa MPUJ nga nagbiyahe sa rota 01K giisyuhan og show cause orders nga nagkinahanglan nga sila personal nga moatubang ug mosumite og sinulat nga katin-awan ngadto sa LTO 7 Operations Division.
Si LTO 7 Regional Director Glen G. Galario dali nga milihok human madawat ang video footage gikan sa lokal nga media outlet.
"Ang insidente nahitabo sa intersection sa Colon Street ug Mabini Street, diin klarong gipakita sa video ang modern jeepney nga walay pagpakabana nga nag-counterflow agi sa junction," matud ni Regional Director Galario.
Dugang pa niya nga human makita ang video, gimanduan dayon niya ang iyang Operations Division Chief nga i-isyu ang show cause order.
Sumala sa mga rekord sa rehistrasyon, ang modern PUJ narehistro ubos sa usa ka korporasyon nga nakabase sa Cebu City.
"Due to the gravity and severity of the violation, please be informed that your driver's license and/or motor vehicle registration will be temporarily placed under alarm, preventing any and all transactions while the case is under investigation," matud sa show cause order nga gi-isyu niadtong Biyernes, Hunyo 27, 2025.
Ang drayber mag-atubang og mga kaso ubos sa Section 48 sa Republic Act 4136 kon Land Transportation and Traffic Code of the Philippines, gumikan sa walay pagpakabana sa pagmaneho. / PR