Nakagawas na sa kustodiya sa kapulisan ang drayber sa Mitsubishi Xpander Cross nga unang gikustodiya sa Traffic Police Unit (TPU) sa Cebu City Police Office (CCPO) human namatay ang drayber ug angkas sa motorcycle hailing app nga Move It sa viaduct sa Cebu South Coastal Road (CSCR) sa Brgy. Ermita, siyudad sa Sugbo sa Miyerkules sa buntag, Abril 10, 2024.
Kini human niluwat og pinanumpaang pamahayag ang kabanay sa duha ka mga biktima nga dili na sila mopasaka og kaso.
Matod ni Police Major Jonathan dela Cerna, hepe sa TPU sa CCPO, nga nahusay ra ang ang pamilya sa driver ug pasahero ug ningluwat na sila’g affidavit of desistance.
Kahinumdoman nga nakalas sa maong aksidente sila si Brian James Pedrosa Bayarcal, taga Lamintak Norte, Medellin, ug ang iyang pasahero nga si Chlea Jane Coronel Gomez, taga dakbayan sa Mandaue.
Unang nibangga ang motor sa road separator sa CSCR ug nangalagpot sa pikas lane ug naigo sa SUV nga gimaneho ni Duyongan. / AYB