NANAWAGAN ang Provincial Disaster Risk Reduction and Management Office (PDRRMO) sa mga residente sa Probinsiya sa Sugbo nga dili mag-panic sa gihimong pag-alerto sa Department of Science and Technology (DOST) - Philippine Institute of Volcanology and Seismology (Phivolcs) sa tsunami sa Miyerkules, Hulyo 30, 2025.
Matod ni Dennis Francis Pastor, pangulo sa PDRRMO, nga walay angay nga ikabalaka ang mga residente sanglit layo ra kini sa mga apektadong lugar.
“Naa man ta sulod sa isla we are not directly affected. But anyway we will always disseminate sa LDRRMOs to monitor,” dugang niya.
Sa nasayran, niluwat og advisory ang Department of Interior and Local Government (DILG) sa mga lokalidad nga posible’ng maapektohan sa tsunami tungod sa 8.7 magnitude nga linog nga niigo sa sidlakang-baybayon sa Kamchatka, Russia sa Miyerkules.
Nalakip sa mga LGUs nga girekomendahan sa pagpabakwit sa mas luwas nga lugar ang mga mosunod: Batanes Group of Islands, Cagayan, Isabela, Aurora, Quezon, Camarines Norte, Camarines Sur, Albay, Sorsogon, Catanduanes, Northern ug Eastern Samar, Leyte, Southern Leyte, Dinagat Islands, Surigao Del Norte ug Del Sur, Davao del Norte, Davao Oriental ug Occidental, ug Davao Del Sur ug De Oro. / ANV